Aldrei fleirum vísað frá landi í Leifsstöð

Lögreglan á Suðurnesjum rannsakaði 69 mál vegna smygls á fíkniefnum, peningaþvættis og flutningi á reiðufé úr landi á síðasta ári, en það sem af er þessu ári hafa 58 slík mál komið inn á borð lögreglu.

Þá hefur aldrei fleiri farþegum verið vísað frá landinu á Keflavíkurflugvelli. 

Hafa lagt hald á 65 kíló af kókaíni

Í tilkynningu lögreglunnar kemur fram að í málunum sem um ræðir hafi sakborningar verið handteknir á Keflavíkurflugvelli við komu til landsins eða vegna gruns um að vera með illa fengið fé í fórum sínum á leið úr landi. 

Lagt hefur verið hald á 65 kg af kókaíni, 14.000 töflur af oxycontini, 1.800 töflur af contalgini, 100 kg af kannabisi, amfetamínbasa og ýmis önnur efni sem bönnuð eru hér á landi.

Auk þessa hafa lögregla og tollgæsla lagt hald á um 60 milljónir króna í reiðufé og telst tolleftirlit í komusal flugstöðvarinnar því árangursríkt. 

Tíu einstaklingar á dag

Fram kemur í tilkynningunni að árið 2022 hafi 80 einstaklingar setið í gæsluvarðhaldi að kröfu lögreglunnar á Suðurnesjum í samtals 2.903 daga árið 2022, eða 8 einstaklingar að jafnaði alla daga ársins. 

Á þessu ári hafa 96 einstaklingar sætt gæsluvarðhaldi á sömu forsendum í samtals 2.617 daga, eða um tíu einstaklingar á dag. 

Þá hefur aldrei fleiri farþegum verið vísað frá landinu á Keflavíkurflugvelli við komu þeirra til landsins og eru 258 frávísunarmál skráð það sem af er ári. Fer þar mest fyrir frávísun einstaklinga frá landinu vegna tengsla þeirra við brotastarfsemi. 

Landamæraeftirlit umfangsmikið og krefjandi

Í tilkynningunni segir að mikilvægt sé að starfsemi lögreglu og tollgæslu á Keflavíkurflugvelli sé öflug og að vel þjálfaður mannskapur sé til staðar auk nauðsynlegs tækjabúnaðar og viðunandi starfsaðstöðu.

Auk þess sé samstarf Evrópuríkja á sviði lögreglusamstarfs og landamæraeftirlits sem byggist á Schengen samningnum er gríðarlega umfangsmikið og krefjandi, ekki síst fyrir Ísland vegna fjarlægðar landsins frá meginlandi Evrópu.

• Blogga um frétt