Hafa ekki áhuga á að sameinast Reykjavík

Bæjarstjórar Mosfellsbæjar og Seltjarnarnesbæjar hafa ekki áhuga á sameiningarviðræðum við Reykjavíkurborg.

Regína Ásvaldsdóttir, bæjarstjóri í Mosfellsbæ segir að slíkt hafi pólitíkin í Mosfellsbæ ekki rætt og hún gefur sér að það sé ekki efst á dagskrá. Þór Sigurgeirsson, bæjarstjóri á Seltjarnarnesi, segir að slíkar hugmyndir séu tímasóun og að tíma borgarstjórnar sé illa varið í þær.

Frétt af mbl.is

12,8 milljarða lakari niðurstaða en áætlað var

Sameinuð mynda órofa heild

Líf Magneudóttir, borgarfulltrúi Vinstri grænna, mun leggja til að Reykjavíkurborg bjóði Mosfellsbæ og Seltjarnarnesbæ til viðræðna um sameiningu sveitarfélaganna. Segir hún í greinargerð með tillögu sinni að viðfangsefni sveitarfélaga hafi orðið fleiri og flóknari og bendir á mikilvægi þess að unnt sé að vinna að skipulagsmálum og uppbyggingu samgangna á stærri svæðum en núverandi sveitarfélagsmörk segi til um.

„Þannig er t.d. ljóst að Reykjavík og Mosfellsbær sjá fyrir sér stórfellda uppbyggingu á nálega samliggjandi svæðum á allra næstu árum.

Seltjarnarnes, Reykjavík og Mosfellsbær myndu sameinuð mynda órofa heild á norðanverðu höfuðborgarsvæðinu,“ segir í greinargerðinni.

Frétt af mbl.is

Sveitarfélögin í mjög erfiðri stöðu

Ekki efst á dagskrá

Regína segir í samtali við mbl.is að tillaga borgarfulltrúans um sameiningarviðræður við sveitarfélögin tvö hafi komið sér á óvart.

„Auðvitað er þetta tillaga um samtal en ég hef ekki skynjað neinn áhuga hjá núverandi meirihluta á sameiningarumræðum. Auðvitað eru sveitarfélög á Íslandi of mörg að mínu mati en ég teldi nærtækara að sameina sveitarfélög þannig að einingarnar væru um 20-30 þúsund heldur en að fara að sameinast Reykjavík.“

Líf vísar í tillögu sinni í borgarstjórn til sameiningarkosninga árið 1993 en þá var stuðningur Seltirninga og Mosfellinga nokkru minni en stuðningur í Kjósarhreppi en litlu mátti muna að íbúar þar hefðu samþykkt sameiningu en sameining Reykjavíkur og Kjalarness varð að veruleika skömmu síðar.

Regína telur að staðan hafi ekki breyst.

„Við eigum í miklu og góðu samstarfi við Reykjavík sem og önnur sveitarfélög á höfuðborgarsvæðinu en þetta er eitthvað sem pólitíkin hefur ekki rætt og ég gef mér að þetta sé ekki efst á dagskrá.“

Frétt af mbl.is

Margra anga kolkrabbi sem þarf að beisla

„Gleymdu hugmyndinni“

Þór segir í samtali við mbl.is að Líf hafi bara getað rifið upp símann og hringt í sig.

„Gleymdu hugmyndinni. Ég hefði getað sagt henni þetta strax. Hún hefur greinilega ekki aflað sér nægilegra heimilda áður en hún óð af stað í þetta – tvo tapaða tíma fyrir borgarstjórn sem þau fá aldrei aftur. Ég held að tíma borgarstjórnar sé mjög illa varið í þetta. Ég held að það sé nóg annað að gera hjá þeim.“

• Blogga um frétt