Borgarstjóri boðar fjölda hótela

Dagur ræddi þessi verkefni á opnum fundi um bættar samgöngur sem fram fór í Salnum í Kópavogi síðastliðinn fimmtudag.

Dagur sagði tugmilljarða fjárfestingu hafa átt sér stað í nýrri afþreyingu fyrir ferðamenn í borginni á síðustu árum. Þá vakti hann athygli á því að þegar leiðtogar Evrópuráðsins funduðu í Hörpu í maí sl. hefðu þeir allir gist á hótelum sem voru ekki til þremur árum áður. Þ.e.a.s. á Marriott Reykjavík Edition-hótelinu við Hörpu, Parliament-hótelinu við Austurvöll og Hótel Reykjavík Sögu við Lækjartorg.

„Það er fullt af verkefnum í þróun, líka í þessum fjögurra og fimm stjörnu hópi, sem mun halda áfram að draga hingað betur borgandi ferðamenn,“ sagði Dagur og benti á myndir af hótelum sem sjá má hér að neðan.

Meðal þessara verkefna er fyrirhugað hótel á Kirkjusandi.

Kort/mbl.is

Allt að 285 herbergi

Samkvæmt samþykktu deiliskipulagi er stefnt að hótelbyggingu vestast á Kirkjusandi, við sjávarsíðuna gegnt Borgartúni.

Kjartan Smári Höskuldsson, framkvæmdastjóri Íslandssjóða og stjórnarformaður 105 Miðborgar, segir nokkra rekstraraðila hafa sýnt áhuga á hótellóðinni. Gert sé ráð fyrir hótelbyggingu með allt að 285 herbergjum sem teljist vera stórt hótel í borginni.

Til samanburðar eru 320 herbergi á Fosshótelinu á Höfðatorgi en það er stærsta hótel landsins í herbergjum talið.

„Það eru viðræður í gangi við nokkra aðila um að reisa hótel á Kirkjusandi,“ segir Kjartan Smári.

Nán­ari um­fjöll­un er að finna í Morg­un­blaðinu í dag.