Bandaríkin setja norðurslóðir í forgang

Annar dagur þings Hringborðs norðurslóða, Arctic Circle, hófst í morgun með fjölmörgum málstofum í Hörpu og á Reykjavík Edition. Þá var helst verið að ræða rannsóknarsamstarf á norðurslóðum, réttindabaráttu frumbyggja og orkuskiptin.

Lisa Murkowski, öldungadeildarþingmaður á Bandaríkjaþingi fyrir Alaska, flutti erindi sitt á málstofu í Silfurbergi í Hörpu eftir hádegi en þar fjallaði hún um nýja sýn Bandaríkjanna á norðurslóðum. 

Sagði hún það mikinn heiður að fá að vera þátttakandi á þessu þingi, sem væri það stærsta hingað til, en hún hefði því miður misst af þinginu í fyrra. Tók hún fram að á fyrstu þingum Hringborðs norðurslóða hefði fámennur hópur mætt frá Bandaríkjunum en í dag væri hún stolt að sjá fjölmennan hóp mættan þaðan og þá sérstaklega frá Alaska.

Frétt af mbl.is

Það er of seint að vera ekki bjartsýnn

Láta nú verkin tala

Murkowski sagði að loks væru Bandaríkin og áhugi þeirra á norðurslóðum orðin sýnileg. Bandaríkin væru loksins farin að meta að þau væri heimskautsþjóð og að framtíðarsýnin fyrir svæðið væri á hægan en öruggan hátt að taka á sig mynd.

Sagðist hún þó verða að viðurkenna að þetta hefði ekki alltaf verið auðvelt.

„Það tekur á að ýta steini á undan sér upp brekku en sýnin okkar er enn sú að þetta er verk í vinnslu sem er langt í frá fullkomið. Það vantar enn nokkra hluti upp á en ég held að við höfum snúið þessu úr því að tala um stefnu yfir í það að hrinda henni í framkvæmd.“

Ólafur Ragnar Grímsson, fyrrverandi forseti Íslands, og Murkowski eru góðir vinir. Þau settust niður eftir ræðu hennar og buðu upp á spurningar úr sal. mbl.is/Eggert Jóhannesson

Gera þarf svæðið aðlaðandi fyrir komandi kynslóðir

Fór Murkowski einnig yfir að verið væri að gera sögulegar fjárfestingar, sem snúa að grunnþörfum í nútímasamfélagi, svo íbúar á norðurslóðum gætu notið sem allra bestu lífskjara á sínum heimaslóðum. 

Bætti hún því við að miklar breytingar hefðu átt sér stað á svæðinu og að fólkið sem byggi þar væri í forgangi. Tryggja þyrfti fæðuöryggi og að gera svæðið aðlaðandi til að koma í veg fyrir að komandi kynslóðir flyttu ekki í burtu.  

Lagði hún að lokum mikla áherslu á að Bandaríkjamönnum væri alvara þegar kæmi að því að standa við gefin loforð hvað norðurslóðirnar varðar. Þeir væru nú þegar búnir að taka sig mikið á og styrkja sambönd sín við aðrar þjóðir á svæðinu.

„Það fer ekki á milli mála að við erum að gera betur og höfum tekið okkur á. Nú felast áskoranir okkar í því að standa við þessar skuldbindingar, byggja áfram á þeim árangri sem við höfum náð og tækla þær áskoranir sem fram undan eru. Við eigum góða bandamenn hér á norðurslóðum sem eru að fást við það sama, við erum því ekki ein.“

• Blogga um frétt