Vilhjálmur endurkjörinn formaður SGS

Vilhjálmur Birgisson, formaður Verkalýðsfélags Akraness, var endurkjörinn formaður Starfsgreinasambandsins til tveggja ára á níunda þingi félagsins sem lauk í dag.

Guðbjörg Kristmundsdóttir, frá Verkalýðs- og sjómannafélagi Keflavíkur og nágrennis, var einnig endurkjörin sem varaformaður.

Sjö voru í framboði sem aðalmenn í framkvæmdastjórn og voru þeir sjálfkjörnir. Eftirtaldir munu sitja sem aðalmenn í framkvæmdastjórn sambandsins til næstu tveggja ára:

• Aðalsteinn Árni Baldursson, Framsýn stéttarfélag
• Anna Júlíusdóttir, Eining-Iðja
• Eyþór Þ. Árnason, Verkalýðsfélagið Hlíf
• Bergvin Eyþórsson, Verkalýðsfélag Vestfirðinga
• Guðrún Elín Pálsdóttir, Verkalýðsfélag Suðurlands
• Hjördís Þóra Sigurþórsdóttir, AFL Starfsgreinafélag
• Þórarinn Sverrisson, Aldan stéttarfélag

Sem varamenn í framkvæmdarstjórn voru kosnir eftirtaldir:

• Guðný Óskarsdóttir Drífandi stéttarfélag
• Tryggvi Jóhannsson Eining-Iðja
• Birkir Snær Guðjónsson AFL Starfsgreinafélag
• Alma Pálmadóttir Verkalýðsfélagið Hlíf
• Silja Eyrún Steingrímsdóttir Stéttarfélag Vesturlands

Í tilkynningu á vef SGS kemur fram að umræður um kjaramál hafi verið áberandi á þinginu, enda kjarasamningavetur framundan. Þá sé ljóst að SGS fari sameinað og tilbúið í komandi viðræður, en félagið fer með umboð allra 18 aðildarfélaga sinna í viðræðum um nýja kjarasamninga á almenna markaðinum.

Á þessu þingi voru ekki fulltrúar frá Eflingu, enda sagði Efling sig úr SGS fyrr á þessu ári. Efling hafði samt ekki verið í samfloti með SGS í síðustu kjarasamningaviðræðum.

• Blogga um frétt