Innlent | mbl | 28.10.2023 | 14:26

Landris hafið nærri Svartsengi

Miðja landrissins er nærri Bláa lóninu, um 1,5 km norðvestan við Þorbjörn, en þetta er í fimmta sinn síðan árið 2020 sem landris mælist þar. mbl.is/Kristinn Magnússon

Landris nærri Svartsengi, norðvestan við Þorbjörn á Reykjanesskaga, virðist hafa hafist í gær en nýjustu gögn Veðurstofu Íslands benda til þess.

„Nýjustu GPS gögn og InSAR mynd unnin úr gervitunglagögnum frá því síðdegis í gær sýna skýr merki um landris nærri Svartsengi,“ segir á vefsíðu Veðurstofunnar.

Þar segir að landrisið bendi til aukins þrýstings, líklegast vegna kvikuinnskots. Miðja landrissins er nærri Bláa lóninu, um 1,5 km norðvestan við Þorbjörn, en þetta er í fimmta sinn síðan árið 2020 sem landris mælist þar.

Frétt af mbl.is

Líkur á tíðari skjálftahrinum

Landris hraðara en áður

„Fyrsta mat á hraða landrissins sem er í gangi núna er að það sé hraðara en áður. Að svo stöddu er ekki merki um að kvika færist nær yfirborði, aðstæður geta hins vegar breyst á skömmum tíma.

Sprunguhreyfingar vegna gikkskjálfta nærri og austan Svartsengis gætu mögulega gert kvikunni kleift að færast grynnra í skorpunni,“ segir á vef Veðurstofunnar.

Margþætt ferli kvikuhreyfinga í jarðskorpunni hafa áhrif á stóru svæði á Reykjanesskaga. Þensla heldur áfram við Fagradalsfjall en aflögun virðist hafa stöðvast við Festarfjall. Nú síðasta sólarhring sýna gögnin landris nærri Svartsengi.

Frétt af mbl.is

Reiknar með eldgosi á næsta ári

Skjálftarnir fleiri en 7.000

Fleiri en 7.000 skjálftar hafa mælst frá því að skjálftahrina hófst norðan við Grindavík 25. október.

Yfir 7.000 jarðskjálftar hafa mælst í jarðskjálftahrinu sem hófst 25. október norðan við Grindavík. Hrinan stendur enn yfir þótt dregið hafi úr virkninni. Enn er líkur á að jarðskjálftar finnist á svæðinu.

„Líkanareikningar verða gerðir í dag til að reyna að áætla dýpi og stærð innskotsins norðvestan við Þorbjörn,“ segir jafnframt á vef Veðurstofu Íslands.