Ekkert samráð við forsætisráðherra
Setja bókamerki
Katrín Jakobsdóttir forsætisráðherra segir að Ísland hefði átt að greiða atkvæði með ályktun Jórdaníu um vopnahlé á Gasa. Þetta sagði forsætisráðherra í viðtali í kvöldfréttum Rúv.
Ísland, auk 44 annarra ríkja, sat hjá er greidd voru atkvæði um ályktunina í neyðarumræðu á allsherjarþingi Sameinuðu þjóðanna (SÞ) fyrir helgi. Utanríkisráðuneytið hefur sagt að Ísland hefði stutt ályktunina ef breytingartillaga Kanada, sem tók til grimmdarverka Hamas, hefði náð fram að ganga.
Ákvörðun ekki tekin í samráði við forsætisráðherra
Katrín sagði við Rúv að ekki hefði verið haft samráð við sig áður en fastanefnd tók þá ákvörðun að Íslands sæti hjá í atkvæðagreiðslunni.
„Það var nú ekki neitt samráð haft við mig en hins vegar lá fyrir að afstaða Íslands var alveg skýr fyrir atkvæðagreiðsluna. Hún er sú að við styðjum vopnahlé af mannúðarástæðum. Við teljum mjög brýnt að átökin verði stöðvuð, það skapist líka færi til að koma hjálpargögnum og neyðarbirgðum inn á svæðið,“ sagði hún.
Katrín sagði aftur á móti að afstaða sín og Vinstri grænna sé að „mannúðarkrísan á þessu svæði sé slík að það hefði verið rétt í raun og veru að styðja tillöguna, einfaldlega vegna þess að ástandið er gríðarlega alvarlegt“.
Sagði hún það vonbrigði að ekki hafi náðst breiðari samstaða á vettvangi SÞ „um nálgun á þessi mál“.
Engin aukin spenna í ríkisstjórnarsamstarfinu
Segist hún hafa rætt við samstarfsfólk sitt í ríkisstjórninni, þar á meðal Bjarna Benediktsson utanríkisráðherra, í kjölfar þess að þingflokkur Vinstri grænna lýsti því yfir að hann teldi að Ísland hefði frekar átt að greiða atkvæði með tillögunni.
Spurð af blaðamanni Rúv hvort hún telji hjásetu Íslendinga setja aukna spennu á ríkisstjórnarsamstarfið svarar hún neitandi.
„Um grundvallaratriði erum við sammála og það er okkar stefna Íslendinga. Við höfum viðurkennt Palestínu sem sjálfstætt ríki. Við tölum alltaf fyrir tveggja ríkja lausn.“
Nýju stofnanirnar verða á landsbyggðinni
Nokkrir lýst áhuga á Skaganum 3X
Sérsveitin kölluð til aðstoðar á Suðurlandi
/frimg/1/42/49/1424939.jpg)
3,1 stiga skjálfti við Lambafell
Leitar til Tyrklands eftir 8 ára baráttu
Kærir niðurfellingu máls til ríkissaksóknara
Skjálftahrina sem mun fjara út