Hrinan sennilega að „deyja út“ en ný gæti hafist
Setja bókamerki
Benedikt Gunnar Ófeigsson, sérfræðingur Veðurstofunnar í jarðskorpuhreyfingum, segir að jarðskjálftahrinan á Reykjanesskaga sé líklega að „deyja út“ en það útiloki ekki að ný hrina fari af stað.
Um átta þúsund jarðskjálftar hafa mælst á Reykjanesskaga frá því að skjálftahrina hófst norðan við Grindavík 25. október. Virknin hefur farið dvínandi og ekki hefur mælst skjálfti yfir þremur að stærð í tvo sólarhringa.
„Það segir okkur kannski að hrinan sem er í gangi er að deyja út núna en við getum átt von á nýrri hrinu ef þenslan heldur áfram. Þá fáum við væntanlega aðra hrinu þarna eða annars staðar í kring,“ segir Benedikt sem varar sig á öllum fullyrðingum og bendir einnig á að það sé ávallt ákveðin óvissa í túlkunum á jarðhræringum.
Landrisið „það hraðasta sem við höfum séð“ á svæðinu
Landris hófst á föstudag nærri Svartsengi og virðist landið rísa mun hraðar en áður. Er þetta í fimmta sinn sem landris mælist norðvestan við Þorbjörn á Reykjanesskaga síðan árið 2020.
Á fyrri tíð hefur það tekið landið um tvær vikur að rísa um þrjá sentimetra, sem að þessu sinni tók 24 klukkustundir. Enginn órói mælist þó á svæðinu. Benedikt segir að skjálftahrinan hafi sennilega greitt veg fyrir kvikuinnskotið sem leitt hefur til landrissins norðan Þorbjarnar.
„Þetta er talsvert hraðara en við höfum séð áður. Þetta er það hraðasta sem við höfum séð hingað til [á þessu svæði],“ segir hann. „Það þýðir væntanlega að það sé meira flæði inn en við getum svo sem ekkert sagt meira um það.“
Ekki von á eldgosi á næstu dögum
Benedikt bendir einnig á að engin merki séu um það að kvikan leiti upp á yfirborðið í augnablikinu „en við vitum ekkert hvernig það þróast.“
„Það eru engin mælanleg merki um að kvika sé á leið til yfirborðs akkúrat þessa stundina, þetta virðist fyrst og fremst vera að safnast fyrir á dýpi,“ segir Benedikt.
Því segir hann aðspurður að það séu ekki miklar líkur á eldgosi á næstu sólarhringum.
„Hlutir geta alveg gerst hratt en miðað við hvernig þetta hefur hagað sér undanfarin ár … þá geri ég ekki ráð fyrir að það sé að fara að gjósa þarna fyrirvaralaust. Það ætti að vera einhver meiri aðdragandi að því en þessi. En við getum að sjálfsögðu ekki útilokað neitt,“ segir Benedikt.
Hann bætir þó við að sú sviðsmynd sé uppi að jarðhræringarnar geti endað í eldgosi, þó ekki sé hægt að fullyrða hverjar líkurnar á því séu.
Beðið eftir frekari gögnum
Sérfræðingar eiga von á nýjum gervihnattamyndum síðar í dag og myndu þá frekari upplýsingar um kvikuvirknina liggja fyrir á morgun.
Nærri miðju landrissins eru Grindavík, Bláa lónið, og orkuverið í Svartsengi. Einn af framkvæmdastjórum Bláa lónsins sagði við mbl.is fyrr í dag að lónið legði áherslu á að halda starfsfólki fyrirtækisins vel upplýstu um stöðu mála.
Forstjóri HS Orku, sem rekur orkuverið í Svartsengi, sagði við mbl.is í gær að grannt væri fylgst með þróuninni.
Bæjarstjóri Grindavíkur segir að landris á Suðurnesjum sé vaktað eins vel og hægt er. Ef dregur til frekari tíðinda tekur til starfa viðbragðsteymi.
Viðreisn í mikilli sókn
/frimg/1/52/93/1529389.jpg)
„Mér finnst þetta auðvitað ömurleg staða“
Ekki eins og jólasveinn á hreindýrssleða
Síminn stoppar ekki hjá Árekstur.is
Óeðlilegt að sama gjald verði tekið óháð þyngd
Vonast eftir breiðri þverpólitískri sátt
„Þetta er algerlega hans ákvörðun“