Landrisið við Þorbjörn á Reykjanesskaga heldur áfram á sama hraða. Nýjasta gervitunglamyndin, sem tekin var í gærkvöldi, sýnir 5-6 sentimetra aflögun á 12 daga tímabili með miðju norðvestan við Þorbjörn. 

Þetta kemur fram í tilkynningu á vef Veðurstofu Íslands. 

Sama aflögunarmerki sést á GPS-mælingum á svæðinu og nýjustu GPS-mælingar frá því í morgun sýna að hraði aflögunarinnar er svipaður síðustu daga.

Staðan getur breyst hratt

Kvikuinnskot er á um fjögurra kílómetra dýpi norðvestan við Þorbjörn og er staðsetning kvikunnar óbreytt frá því í gær þegar vart var við kvikuhreyfingar á svæðinu. 

Þá um morguninn hófst ör skjálftavirkni sem var merki um kvikuhlaup og stóð það yfir í um 2 klukkustundir. Nýjustu gögn gefa ekki til kynna að kvika sé að brjóta sér leið grynnra í jarðskorpunni en staðan getur hins vegar breyst hratt.

Hratt landris hefur mælst nærri Svartsengi og Bláa lóninu undanfarna daga. mbl.is/Hákon Pálsson

Gikkskjálftavirkni á næstu dögum 

Eins og mbl.is greindi frá fyrir hádegi hafa um 500 skjálftar mælst á Reykjanesskaga frá miðnætti. Virknin hefur færst vestar, við Eldvörp. Er það um 3 kílómetrum vestan við Þorbjörn.

Í tilkynningu Veðurstofunnar segir að gera megi ráð fyrir að jarðskjálftavirkni haldi áfram norðvestan við Þorbjörn og að skjálftar yfir 4 að stærð gætu fundist í byggð.

Einnig má gera ráð fyrir gikkskjálftavirkni á næstu dögum vegna þess að kvikuinnskotið veldur aukinni spennu á svæðinu. Segir að það sé líkleg útskýring á jarðskjálftavirkni nærri Eldvörpum í dag.

Frétt af mbl.is

Virknin færist yfir í Eldvörp

Tengdar fréttir

Eldvirkni á Reykjanesskaga

Ekkert bendir til þess að atburðarásinni sé lokið

• Munaði 15 milljónum rúmmetra
• Heildarrúmmálið rúmlega 60 milljón m³
• Svipuð þróun og fyrir síðustu gos
• Hætta vegna jarðfalls í sprungur metin töluverð

» Fleiri tengdar fréttir

• Blogga um frétt