Kynnti nýja breytileika af mögulegu verndandi geni

Niðurstöður rannsóknar Dr. Vincent Béringue, eins helsta sérfræðings í heimi í riðuveiki, gefa til kynna að mögulega sé hægt að nýta fleiri arfgerðir en ARR í ræktunarstarfi til að vernda gegn riðuveiki.

Béringue hefur unnið að næmitilraunum með smit frá mismunandi riðuhjörðum á Íslandi. 

Smitaði hann heilbrigða heila íslenskra kinda sem bera mismunandi arfgerðir. Markmið tilraunanna er að sjá hvaða arfgerðir er hægt að smita og hvaða arfgerðir ekki. Þeim arfgerðum sem standast prófið verður mögulega hægt að byggja á í komandi ræktun sauðfjárstofnsins.

Kynnti Béringue niðurstöður sínar á fræðslufundi á vegum Bændasamtaka Íslands á Hvammstanga í dag.

Frétt af mbl.is

110 milljónir til að hraða útbreiðslu sérstakrar arfgerðar

Hægt að leggja til fleiri arfgerðir til ræktunar

Vel var mætt á fundinn að sögn Eyþórs Einarssonar, ráðunauts á búfjárræktar- og þjónustusviði hjá Ráðgjafarmiðstöð landbúnaðarins.

Hann segir í samtali við mbl.is að niðurstöður Béringue gefi til kynna að alla vega þrír breytileikar finnist af þessu mögulega verndandi geni gegn riðu hér á Íslandi auk þess breytileika sem myndar ARR og vitað var af. Segir hann samhljóm við þær niðurstöður sem liggja fyrir úr gömlum riðuhjörðum.

„Þetta þýðir að hægt er að leggja til að nýta til ræktunar fleiri arfgerðir en ARR í ræktunarstarfi og að kindum með fleiri arfgerðir en ARR sé þyrmt ef upp kemur riða.“

Dr. Vincent Béringue, sérfræðingur í riðuveiki við INRAE í Frakklandi, hélt erindi á fundinum. Ljósmynd/Aðsend

Frétt af mbl.is

Heimilt verði að skera niður fjárstofn að hluta

Veitt mönnum aukna bjartsýni

Eyþór segir hljóðið í fundarmönnum hafa verið gott og það sé mikill áhugi fyrir þessum málum á þessu svæði.

„Ég held að þessar niðurstöður hafi veitt mönnum aukna bjartsýni og það er jákvætt skref að yfirdýralæknir sé kominn með þá undanþágu að heimilt verði að skera niður riðusýktan stofn að hluta.“

Eyþór Einarsson, ráðunautur á búfjárræktar- og þjónustusviði hjá Ráðgjafarmiðstöð landbúnaðarins, kynnti ræktunaráætlun á landsvísu til 20 ára. Ljósmynd/Aðsend

Frétt af mbl.is

Fyrstu arfhreinu ARR-lömbin fædd

Gæti verið orðin mjög lítil riðuógn eftir 6-7 ár

Eyþór hélt sjálfur erindi á fundinum um kynbætur fyrir þoli gegn riðu og kynnti ræktunaráætlun um innleiðingu á verndandi arfgerðum í stofninn. Segir hann um 20 ára verkefni að ræða á landsvísu en á áhættusvæðum sé hvatt til þess samkvæmt áætluninni að verndandi arfgerðir verði innleiddar á 10 árum.

„Þannig að eftir 6-7 ár ættu menn að vera komnir mjög langt með það verkefni og ef það tekst þá ætti riðuógnin að vera mjög lítil því við búumst síður við að finna hana á hreinum svæðum eða svæðum þar sem hún hefur ekki fundist í marga áratugi.“

• Blogga um frétt