Drengurinn sem lést í slysinu á Ásvöllum í Hafnarfirði fyrir um viku síðan hét Ibrahim Shah Uz-Zaman.
Hann var átta ára, fæddur í janúar 2015.
Þetta kemur fram á vefsíðu Hraunvallaskóla í Hafnarfirði.
Í tilkynningu á síðunni, sem var birt á laugardaginn, kemur fram að halda átti minningarathöfn um Ibrahim í veislusal Hauka á Ásvöllum í gær.
„Allir eru hjartanlega velkomnir að koma og minnast elsku Ibrahim með hans nánustu,” segir meðal annars í tilkynningunni.
Jarðarför Ibrahims fór fram í Gufuneskirkjugarði síðastliðinn föstudag, að því er greint er frá á Facebook-síðu Menningarseturs múslima á Íslandi.
Drengurinn var á reiðhjóli á bílastæði á milli Ásvallalaugar og íþróttahúss Hauka þegar hann varð fyrir steypubíl.