Varað við snjóflóðahættu í Hlíðarfjalli

Snjóflóðahætta er á svæði Hlíðarfjalls og efra svæðið er sérstaklega varhugavert. Þrjú flóð hafa þegar fallið þennan sólarhringinn.

Þetta kemur fram í tilkynningu á Facebook-síðu Hlíðarfjalls Akureyri. 

Snjógryfja sem starfsmenn Hlíðarfjalls gerðu í 660 metra hæð í gær sýndi veikleik á tæplega 40 sm dýpi þar sem yfirborðhrímkristallar hafa grafist undir nýjum vindfleka sem myndaðist um helgina að því er segir í færslu ofanflóðavaktar Veðurstofu Íslands.

Sökum kuldatíðar undanfarið myndaðist yfirborðshrím á nokkrum stöðum. Yfirborðshrímið gætu hafa orðið að veiku lagi í snjóþekju þegar snjóaði ofan á hrímið um og eftir síðustu helgi. 

Snjóflóð féll í Smugunni í Hlíðarfjalli, líklega í gær í kjölfar þess að hrímlagið grófst í éljaganginum um helgina. 

Önnur snjógryfja var gerð í dag í Kúlusúkk við hlið snjóflóðsins. Sú gryfja sýndi svipaðar aðstæður og sú fyrri. 

• Blogga um frétt