Innlent | mbl | 9.11.2023 | 15:48 | Uppfært 16:22

Vísbendingar um að fólk hafi dvalið í kjallaranum

Tjald ofan á sekkjum í kjallaranum. Ljósmynd/Heilbrigðiseftirlit Reykjavíkurborgar

Vísbendingar eru um að fólk hafi hafst við í kjallaranum að Sóltúni 20, þar sem mikið magn matvæla fannst við óheilsusamlegar aðstæður. Koddar, dýnur, matarílát og tjald fundust í kjallaranum, sem var óhreinn og ekki meindýraheldur.

Hefur heilbrigðiseftirlit Reykjavíkur upplýst lögreglu um mögulega dvöl fólks í rýminu. Þetta kemur fram í eftirlitsskýrslu eftirlitsins.

Vy-Þrif voru með kjallarann á leigu en Davíð Viðarsson, eigandi þrifafyrirtækisins, er stórtækur veitingamaður og á m.a. Vietnam market og 40% hlut í WOKON Mathöll ehf.

Í eftirlitsskýrslum HER segir að kjallarinn hafi verið óhreinn og ekki meindýraheldur. Megn meindýralykt var í kjallaranum og fundust þar bæði Lifandi og dauðar mýs og rottur.