Innlent | mbl | 10.11.2023 | 15:00

73% hlynnt kvennaverkfallinu

Tæp 27% kvenna segjast hafa mætt á Arnarhól í kvennaverkfallinu, þann 24. október, samkvæmt nýrri könnun Prósents. mbl.is/Eggert Jóhannesson

Þó um 73% Íslendinga voru hlynntir verkfallsaðgerðum kvennaverkfallsins þann 24. október voru tæp 15% karla andvíg þeim, samanborið við um 3,5% kvenna.

Þetta kemur fram í nýrri könnun sem Prósent framkvæmdi dagana 30. október til 9. nóvember. Þar fengu 2.300 Íslendingar kost á að taka þátt í könnuninni, þó aðeins 51% þeirra svöruðu.

Ein spurning var aðeins fyrir konur og kvár en ekkert kvár svaraði þó könnuninni. Voru þau spurð hvort þau hefðu mætt á samstöðufundinn á Arnarhóli eða samstöðufund annars staðar á landinu.

Í ljós kom að 26,7% kvenna hefði mætt á fundinn á Arnarhóli, 8,6% mætt á fund annars staðar á landinu en 64,8% ekki mætt á samstöðufund.Samkvæmt þessu mættu um 35% kvenna á samstöðufundinn.

„Höfum fengið mikið stærri sess við borðið“

Baráttufundur vegna kvennaverkfalls. mbl.is/Eggert Jóhannesson

Besta mætingin hjá tekjuhærri konum

Um 40% kvenna sem búsettar eru í Reykjavík mættu á samstöðufund í samanburði við um 33% kvenna sem búa í nágrannasveitarfélögum Reykjavíkur og um 31% á landsbyggðinni.

Hlutfall kvenna sem mættu var hærra í tekjuhæsta hópnum í samanburði við þann tekjulægsta. Um 27% kvenna með einstaklingstekjur undir 400 þúsund krónur mættu í samanburði við 42% kvenna með einstaklingstekjur að upphæð 800 þúsund krónur eða hærri.

Frétt af mbl.is

Ekki færri en á menningarnótt, en mun þéttara

87% kvenna hlynnt verkfallinu

Einnig var spurt um afstöðu til verkfallsaðgerðum kvennaverkfallsins og um 73% svarenda sem tóku afstöðu voru hlynnt verkfallsaðgerðum Kvennaverkfallsins. Um 18% voru hvorki hlynnt né andvíg og um 9% voru andvíg.

Marktækur munur er þó á afstöðu eftir kyni. Um 87% kvenna voru hlynnt verkfallsaðgerðum í samanburði við um 59% karla. En tæp 26% karla voru hvorki hlyntir né andvígir á meðan 15% karla voru andvígir.

Íslendingar á aldrinum 18 til 24 ára voru hlynntari verkfallsaðgerðum en þau sem eldri eru. Allir aldurshópar voru þó að megni hlynntir verkfallsaðgerðunum.

Frétt af mbl.is

Arnarhóll fyllist af konum og kvárum

Flestir telja verkfallið hafa jákvæð áhrif á réttindabaráttuna

Um 66% þjóðarinnar eru sammála fullyrðingunni að kvennaverkfallið muni hafa jákvæð áhrif á réttindabaráttu kvenna og kvára, 22% eru hvorki sammála né ósammála og 12% eru ósammála.

Marktækur munur er eftir kyni þátttakanda. Tæp 79% kvenna eru sammála fullyrðingunni í samanburði við rúm 54% karla.

Um 74% íbúa Reykjavíkur eru sammála því að Kvennaverkfallið muni hafa jákvæð áhrif á réttindabaráttu kvenna, um 68% íbúa nágrannasveitarfélaga Reykjavíkur og um 56% íbúa á landsbyggðinni. Íbúar Reykjavíkur og nágrannasveitarfélaga eru marktækt meira sammála en íbúar landsbyggðarinnar.