Fólk taki ekki númer á bráðadeildinni

„Einstaklingar eru alltaf flokkaðir inn eftir bráðleika,“ segir Andri Ólafsson, samskiptastjóri Landspítalans og ítrekar að slík flokkun hafi farið fram að óbreyttu þegar sjúklingar þurftu að bíða í sjúkrabílum við komu á bráðamóttökuna. 

Slökkviliðið á höfuðborgarsvæðinu sagði í dag að sjúkraflutningamenn hefðu farið í 155 sjúkraflutninga síðasta sólarhringinn.

Sagði í færslu slökkviliðsins að allt hefði verið á öðrum endanum á bráðamóttökunni og að sjúklingar hefðu þurft að bíða í bílunum í allt að 30 mínútur.

Frétt af mbl.is

Sjúklingar látnir bíða í sjúkrabílunum fyrir utan

Andri Ólafsson, samskiptastjóri Landspítalans.

Sumir eigi frekar erindi á læknavakt eða heilsugæslu

Í samtali við mbl.is ítrekar Andri að enginn í bráðri hættu sé látinn bíða á deildinni. Fólk taki ekki númer á bráðadeildinni heldur sé flokkað eftir bráðleika, og því ávallt hliðrað til í starfseminni til að annast einstaklinga í bráðri hættu.

Það þýði að sumir þurfi að bíða, þar á meðal sumir í sjúkrabílum, enda séu ekki allir sem komi með sjúkrabíl í bráðri hættu. Einn álagsvaldur bráðamóttökunnar sé einmitt að sumir einstaklingar leiti þangað sem ekki eigi þar erindi, heldur eigi frekar að leita á læknavaktina eða heilsugæslu. 

Hann segir álagið á spítalanum vissulega hafa verið mikið undanfarna daga, m.a. vegna fjölgunar öndunarfærasýkinga, Covid-smita og tilfella inflúensu, eins og fram kemur í nýlegri tilkynningu spítalans.

Er þar biðlað til fólks að íhuga vel hvort það þurfi að leita á bráðamóttöku, í stað heilsugæslu eða á læknavakt.

Frétt af mbl.is

Bráðamóttakan biður fólk að hugsa sig um

Sjúkdómseinkenni íslenska heilbrigðiskerfisins

Andri segir álag á bráðamóttökunni og á spítalanum vera gamla sögu og nýja, enda hafi lengi verið vandi tengdur aðflæði og fráflæði, þar sem skortur á úrræðum eins og öldrunarheimilum leiði til þess að ekki sé hægt að útskrifa einstaklinga og senda í viðeigandi úrræði. 

Vandinn á bráðamóttökunni sé því í raun aðeins sjúkdómseinkenni stærri vanda innan íslenska heilbrigðiskerfisins. 

• Blogga um frétt