Katrín: Hugur landsmanna er hjá Grindvíkingum
Setja bókamerki
Katrín Jakobsdóttir segir að hugur landsmanna sé hjá Grindvíkingum og þeim sem næst eru upptökum jarðskjálftanna sem hafa riðið yfir Suðurnesin á síðustu klukkustundum.
„Þetta er ótrúlega óþægileg og óhugnanleg staða fyrir íbúa á Suðurnesjum, sérstaklega í Grindavík,“ segir Katrín í samtali við mbl.is.
Allir að vinna hörðum höndum
„Ég held að hugur allra landsmanna sé hjá Grindvíkingum og þeim sem eru næst skjálftunum akkúrat núna. Við finnum auðvitað fyrir þeim hérna á höfuðborgarsvæðinu og vitum hvað þetta er alveg skelfilega óhugnanlegt,“ bætir hún við.
Katrín bendir á að allir viðbragðsaðilar vinni hörðum höndum að því að tryggja öruggar leiðir til og frá Grindavík, en Grindavíkurvegi var lokað í kjölfar þess að öflugur skjálfti setti sprungu í veginn.
Vinna hafin við að reisa varnargarða
Hættustigi var lýst yfir vegna skjálftanna um kl. 18 í kvöld. Vinna við að reisa varnargarða í kringum virkjunina í Svartsengi á Reykjanesskaga hófst stuttu síðar þegar Guðrún Hafsteinsdóttir dómsmálaráðherra setti vinnuna af stað í samráði við almannavarnir, Verkís og fleiri, þrátt fyrir að frumvarp þess efnis hafi enn ekki verið lagt fyrir þingið.
„Nú erum við náttúrulega komin á hættustig og þá eru auðvitað ríkari heimildir til þess að ráðast í ýmsar framkvæmdir. Við [ríkisstjórnin] höfum líka verið að undirbúa frumvarp í dag,“ segir Katrín.
Frumvarpið sem hún vitnar til miðar að því undirbúa ramma svo hægt verði að fara í forvarnaraðgerðir sem skjótast, í því skyni að hefja uppbyggingu varnargarða áður en hugsanleg eldsumbrot hefjast.
„Við miðum samt við það að við leggjum fram þetta frumvarp til að hafa mjög skýra lagaheimild fyrir þeim framkvæmdum sem þarf að ráðast í. Því við erum væntanlega að sjá fram á áframhald,“ segir Katrín að lokum.
Skipulagði aðgerðir fyrir Ólympíuleikana
Umboðsmaður barna krefur ráðherra um svör
Dagbjört dæmd í 10 ára fangelsi fyrir líkamsárás
Hyggst skoða lög um nafnabreytingar
Mönnun lögreglu líður fyrir mótmæli
Segir PISA-niðurstöðurnar endurspegla menntakerfið