Innlent | mbl | 10.11.2023 | 20:13

Vegurinn rifnaði undir bílnum

Vegurinn fór í sundur er Gunnar og kona hans voru að keyra til Grindavíkur. Samsett mynd

Grindavíkurvegur rifnaði sundur í kröftugustu jarðskjálftunum síðdegis í dag. Gunnar Stefán Bjarnason, íbúi í Grindavík, og kona hans voru að keyra veginn til Grindavíkur þegar hann fór í sundur og tók bíll þeirra stökk á veginum.

„Við vorum búin að finna fyrir jarðskjálftunum í bílnum á leiðinni. Svo sáum við að bíllinn fyrir framan okkur hægði á sér. Síðan sjáum við ekki neitt fyrir framan okkur. Svo allt í einu kemur sprunga beint fyrir framan okkur. Hún reis ekki upp fyrir framan okkur, hún var bara allt í einu fyrir framan okkur. Við verðum bara skíthrædd og bíllinn bara hoppar. Við tökum eiginlega ramp á þetta, bíllinn skoppar, svo lendir eitt hjól og svo annað,“ segir Gunnar.

Frétt af mbl.is

Myndskeið: Grindavíkurvegi lokað vegna sprungu

Bíllinn var ökuhæfur eftir stökkið. Ljósmynd/Gunnar Stefán

Aldrei verið jafn hræddur á ævinni

Hann segir þau lítið hafa hugsað út í það að komast út í kant eftir að bíllinn var aftur lentur á jörðinni. Þau bara stöðvuðu bílinn og hringdu í lögregluna.

„Lögreglan var sirka tíu mínútur á leiðinni og kom og lokaði veginum,“ segir Gunnar. Þau stigu út úr bílnum áður en lögreglan kom og fundu allan tímann fyrir skjálftum.

„Ég var í sveitinni þegar Eyjafjallajökull var að fara að gjósa. Það var hræðsla þá. En þarna hef ég aldrei verið jafn hræddur á ævinni. Mér leið eins og skjálftinn væri bara beint fyrir neðan. Maður skoppaði eiginlega bara upp og niður,“ segir Gunnar.

Lausamunir heimilisins fóru á flakk í skjálftunum í dag. Ljósmynd/Gunnar Stefán

Lausamunir komnir út um allt

Bíllinn, þó mikið tjónaður, var ökuhæfur og komust þau til Grindavíkur. Þar tók á móti þeim ófögur sjón, allir lausamunir á heimilinu voru komnir út um allt. Tengdafaðir Gunnars kom og sótti þau til Grindavíkur og þegar mbl.is talaði við hann voru þau á leiðinni til Reykjavíkur.

Ætla þau að leita á bráðamóttökuna í kvöld, en mikið högg varð þegar þau lentu aftur á jörðinni eftir að sprungan opnaðist undir bílnum. Þau munu svo eyða nóttinni hjá móður Gunnars í Reykjavík.