Íbúum í Þórkötlustaðahverfi í Grindavík er einungis heimilt að sækja gæludýr og ómissandi eigur. 

Þetta kemur fram í tilkynningu frá almannavörnum og þar segir að um sé að ræða skipulagða og stýrða aðgerð undir stjórn lögreglunnar. 

Frétt af mbl.is

Íbúar Þórkötlustaðahverfis fá að sækja nauðsynjar

Heimildin nær eingöngu til þessa tiltekna hverfis, ekki annarra hverfa eða svæða í Grindavík. 

Þá segir að sérstök aðgerð sé í gangi til þess að sækja alla hesta í hestahverfinu norðan við Austurver. 

„Við ítrekum við aðra íbúa að keyra alls EKKI í átt að Grindavík og ekki safnast saman á lokunarpóstum. Íbúar í Þórkötlustaðahverfi sem fá að fara inn til Grindavíkur fara ekki þangað á eigin bílum. Íbúar sem fá að fara inn í til Grindavíkur eiga að koma á söfnunarstaðinn sem er bílastæðið við gossvæðið, við Fagradalsfjall,“ segir í tilkynningunni. 

Ekki er heimilt að aka í gegnum Grindavíkurbæ, því þarf að koma um Suðurstrandarveg að austan eða frá Þorlákshöfn eða Krýsuvíkurvegi.

„Heimild til þess að fara inn í bæinn er ábyrgðarhluti og ekki léttvæg ákvörðun og þýðir alls ekki að svæðið sé að öðru leyti opið fyrir umferð. Þetta verður skipulögð og stýrð aðgerð undir stjórn lögreglunnar,“ segir í tilkynningunni.

Til athugunar fyrir íbúana:

• Ekki fara ef þú þarft ekki nauðsynlega að fara
• Aðeins verður leyfi fyrir einn aðila að fara inn á svæðið, fyrir hvert heimili
• Skráið niður lista yfir það sem þið hyggist sækja áður en lagt er af stað
• Munið eftir húslykli
• Búr fyrir gæludýr ef þörf er á
• Poka eða annað undir muni
• Íbúar hafa stuttan tíma inni á heimilinu.
• Þau sem fara mega ekki vera með bráðaofnæmi fyrir dýrum því það verða gæludýr með í för í bakaleiðinni.
• Þetta er eingöngu til þess sækja mjög mikilvæga hluti s.s. gæludýr, lífsnauðsynleg lyf, hugsanlega vegabréf eða aðra ómissandi hluti fyrir heimilisfólk
• Heimilt verður að keyra ökutæki sem skilin voru eftir við rýmingu, út af svæðinu frá Grindavík, en eingöngu í fylgd viðbragðsaðila

Ekki liggur fyrir hvort eða hvenær mögulegt verður að fara í samskonar leiðangra í önnur hverfi.

Tengdar fréttir

Eldvirkni á Reykjanesskaga

Telur að eldgosahrinan sé að fjara út

• Auknar líkur á kvikuhlaupi eða eldgosi í lok janúar
• Margir leituðu svara um eldgos og umbrot
• Magnús Tumi stillir upp þremur sviðsmyndum
• „Við erum sátt“

» Fleiri tengdar fréttir

• Blogga um frétt