Innlent | mbl | 14.11.2023 | 3:40 | Uppfært 10:42

Þetta ástand muni vara næstu 10 til 15 árin

Ármann Höskuldsson eldfjallafræðingur segir ekki spurning hvort það verði eldgos heldur hvar. Samsett mynd

Með hverjum deginum sem líður þá minnka líkurnar á að eldgos verði í Sundhnúkagígaröðinni og aukast á því að það verði í Eldvörpum. Það er ekki spurning hvort það verði eldgos á næstu dögum og vikum, heldur hvar.

Þetta segir Ármann Höskuldsson, eldfjallafræðingur við Jarðvísindastofnun Háskóla Íslands, í samtali við mbl.is.

Spurður hvort það verði gos segir hann að með hverjum deginum sem líði minnki líkur á gosi í Sundhnúkasprungunni en það verði samt sem áður eldgos í náinni framtíð.

Frétt af mbl.is

Hver er þessi Sundhnúkagígaröð?

Alveg klárt að það verður eldgos

„Það er alveg klárt að það verður eldgos en það er spurning hvar eldgos verður. Stóru flekahreyfingarnar eru komnar í gang og byrjaðar að opna allt kerfið. Þá er alveg ljóst að það verður eldgos einhvern tímann á næstu dögum, mesta lagi eftir eina viku eða tvær,“ segir Ármann.

„Við fengum þennan mikla atburð á föstudaginn, sem er búinn að standa yfir helgina, og á meðan það kemur ekki eldur upp úr Sundhnúkasprungunni þá minnka líkurnar á því að eitthvað gerist í Sundhnúkasprungunni,“ segir Ármann.

Hann segir að á föstudag og laugardag hafi í raun verið mestar líkur á gosi í Sundhnúkagígaröðinni. Þar af leiðandi séu líkur á því minnkandi með hverjum deginum sem líður frá því.

Frétt af mbl.is

Stærsti skjálftinn frá því á laugardag

Meiri líkur á því að kvikan komi upp í Eldvörpum

„Kvikan sem er núna úti í Eldvörpum, það er ólíklegt að hún hafi öll farið í þennan gang [Sundhnúkasprunguna], mögulega eitthvað, en hún er enn þá til staðar. Núna kemur bara í ljós á næstu dögum, haldi áfram að rísa þar og haldi áfram að belgjast upp landið út í Eldvörpum og undir Illahraunssprungunni – þá aukast líkur á því að þar komi kvika upp en ekki í Sundhnúkasprungunni,“ segir Ármann.

Nú þarf að skoða mælingar næstu daga til að sjá hvort landris sé ekki alveg örugglega enn í gangi undir Eldvörpum.

Frétt af mbl.is

Telur gos líklegra í Eldvörpum

Næst eru Bláfjöll, Krýsuvík eða Hengillinn

„Þegar kvikan er orðin nægileg til að komast upp til yfirborðs þá gerir hún það frekar þar [Eldvörpum] en á Sundhnúkasprungunni,“ segir Ármann.

„Í fyrsta lagi þá erum við á flekamótum. Flekarnir eru stöðugt að fara í sundur en akkúrat flekamótin sjálf, þau geta haldið í sér í svolítinn tíma en þegar þau bresta þá myndast aðstæður svo að kvika komist til yfirborðs og það er að gerast á Reykjanesi,“ segir Ármann og bætir því við að þetta ástand muni vera í gangi næstu 10-15 ár á Reykjanesskaga.

„Þegar þetta kerfi er búið að klára sig af þá fer næsta kerfi í gang. Þá förum við væntanlega annaðhvort í Bláfjöllin eða í Krýsuvíkurkerfið eða jafnvel upp í Hengilskerfið.