Grindvíkingar fjölmenntu á leik Grindavíkur og Þórs frá Akureyri í úrvalsdeild kvenna í körfuknattleik í Smáranum í Kópavogi í dag. 

Vann Grindavík sannfærandi sigur, 93:63, en eins og flestum er kunnugt var ekki hægt að spila leikinn í Grindavík og bauðst Breiðablik til þess að hýsa hann í Smáranum. 

Karlalið Grindavíkur leikur gegn Hamri nú síðdegis, einnig í Smáranum. Hefst sá leikur klukkan 17.

Hér fyrir neðan má sjá myndir af mannfjöldanum en vel yfir þúsund manns mættu á leikinn.