Þitt nafn bjargar lífi

Íslandsdeild Amnesty International stóð fyrir viðburði í Kringlunni í gær til að vekja athygli á árlegri og alþjóðlegri herferð Amnesty International, Þitt nafn bjargar lífi, en herferðin í ár er helguð tíu málum sem flest tengjast frelsisskerðingu með einum eða öðrum hætti, segir í tilkynningu frá Íslandsdeild Amnesty International. 

Frétt af mbl.is

„Þitt nafn bjargar lífi“

Söngkonan Elín Ey steig fram á svið ásamt hópi ungs listafólks og flutti eigin útgáfu af laginu „Hvaða frelsi?“ eftir Hjálma.

Elín Ey flutti útgáfu af laginu „Hvaða frelsi?“ Ljósmynd/Aðsend

Elín flutti lagið í sérsmíðuðu fangelsi og svo mun listahópur ungs fólks frá Menntaskólanum við Hamrahlíð standa fyrir gjörningi þar sem fangelsið er tekið í sundur með táknrænum hætti, segir enn fremur í tilkynningu. 

Elín Ey flutti lag í sérsmíðuðu fangelsi, sem var svo tekið í sundur með táknrænum hætti. Ljósmynd/Aðsend

Tjáningarfrelsið skert

Á staðnum var fólk á vegum Íslandsdeildar Amnesty International sem safnaði undirskriftum fyrir málin tíu í herferðinni. 

Í tilkynningu segir að málin í ár séu fjölbreytt og frá öllum heimshornum. Víða er tjáningarfrelsið skert og fólk sætir fangelsisvistar fyrir það eitt að tjá sig í óþökk stjórnvalda. Sumir eru myrtir eða í felum vegna lífslátshótana fyrir það eitt að krefjast umbóta. 

Safnað var undirskriftum fyrir málin tíu í herferðinni. Ljósmynd/Aðsend

Hægt er að lesa nánar um málin tíu á vefsíðu Íslandsdeildar Amnesty International. 

• Blogga um frétt