Unnið er nótt sem nýtan dag að því að reisa varnargarða umhverfis virkjunina í Svartsengi, sem sér tugþúsundum fólks fyrir rafmagni og heitu vatni. Landsnet gerir nú ráðstafanir til að hækka möstur í Svartsengislínu 1 sem liggur frá orkuverinu til tengivirkisins við Rauðamel. Er það gert til að varnargarðarnir sem nú rísa hafi ekki áhrif á línuna.

HS Veitur munu bráðlega hefja borun til að koma upp varavatnsbóli við Árnarétt í Garði. Er það vegna þeirrar ógnar sem mögulega steðjar að vatnsbólinu í Lágum í Svartsengi. Vatnsbólið sér bæði Reykjanesbæ og Suðurnesjabæ, eða um 25 þúsund manns, fyrir neysluvatni. Áætlað er að framkvæmdin muni taka um þrjár vikur.

mbl.is/Eggert Jóhannesson

Enn mælist mikið og hratt landris við Svartsengi. Ný gögn frá Veðurstofunni staðfesta að kvika flæði áfram þar undir.

Veðurstofan gaf í gær út nýtt hættumat og kort fyrir svæðið í kringum Grindavík og Svartsengi. Hættusvæðið var stækkað og því skipt í þrennt eftir alvarleika hættunnar. Mestar líkur eru taldar á að kvika komi upp fyrir miðjum kvikuganginum við Hagafell og Þorbjörn. 

Lesa má meira um málið í Morgunblaðinu í dag. 

Tengdar fréttir

Eldvirkni á Reykjanesskaga

„Mikilvægt að hvíla viðbragðið“

• Þetta er orð ársins 2024
• Heildarflatarmálið 9 km²: Landris heldur áfram
• Annað gos gæti brotist út í febrúar
• Vilja varðveita ummerki jarðhræringanna í Grindavík

» Fleiri tengdar fréttir