Forsetahjónin kynna sér breytt samfélag í Reykjavík

Guðni Th. Jóhannesson, forseti Íslands, og Eliza Reid forsetafrú fara í opinbera heimsókn til Reykjavíkur á morgun.

Þar munu þau kynna sér starfsemi borgarinnar, þróun hennar og breytta samfélagsgerð, að því er segir í tilkynningu. Í lok dags verður opinn viðburður á Kjarvalsstöðum þar sem borgarbúum og öðrum gestum er boðið að hitta forsetahjónin og njóta skemmtidagskrár fyrir alla fjölskylduna.

Frá þessu er greint í tilkynningu frá Bessastöðum en þetta er fyrsta opinbera heimsókn forseta Íslands til borgarinnar frá árinu 1986, þegar Vigdís Finnbogadóttir heimsótti Reykjavík á 200 ára afmæli borgarinnar.

Heilsa upp á starfsfólk Grindavíkur

Heimsóknin hefst í ráðhúsi Reykjavíkur þar sem Dagur B. Eggertsson borgarstjóri og Arna Dögg Einarsdóttir, eiginkona hans, taka á móti forsetahjónunum, ásamt Skólahljómasveit Vestur- og Miðbæjar.

Þar heilsa forsetahjónin upp á starfsfólk borgarinnar en einnig starfsfólk Grindavíkurbæjar sem hefur aðstöðu í Ráðhúsinu um þessar mundir, þar sem búið er að rýma Grindavíkurbæ vegna yfirvofandi eldgoss.

Frétt af mbl.is

Borgin kynnir aðgerðir fyrir Grindvíkinga

Heimsækja skóla og leikskóla

Forsetinn og forsetafrú fara síðan um borgina í fylgd borgarstjórahjóna og verður sjónum einkum beint að nýrri hverfum borgarinnar austan Elliðaáa.

Forsetahjónin heimsækja einnig íslenskuver í Breiðholtsskóla, hitta börnin í fjölmenningarlega leikskólanum Ösp, funda með unglingum í Austurbergi og með sendiherrum ólíkra málhópa í Gerðubergi.

Þá heimsækja þau Smiðjuna, sem er virknimiðstöð fyrir fólk með fötlun í Grafarvogi, og líta inn á fimleikaæfingu eldri borgara í Árbæ. Hverfismiðstöðin í Úlfarsárdal verður einnig skoðuð en þar tengjast skóli, bókasafn, íþróttahús og nýjasta sundlaug borgarinnar í einum kjarna.

Samkoma á Kjarvalsstöðum

Forsetahjónin munu einnig kynna sér starfsemi nýja kvikmyndaþorpsins í Gufunesi og heimsækja Elliðaárdal þar sem starfsemi Orkuveitunnar hefur öðlast nýtt líf á sögulegum stað.

Kl. 17 hefst síðan samkoman á Kjarvalsstöðum sem öllum borgarbúum er boðið til. Heimsókn forsetahjóna til Reykjavíkur lýkur svo með hátíðarkvöldverði í Höfða í boði borgarstjóra.

• Blogga um frétt