Innlent | mbl | 23.11.2023 | 16:48

Samstaða um styttuna af séra Friðriki

Að sögn Einars Þorsteinssonar, formanns borgarráðs, hlaut ákvörðunin einróma samþykki. Samsett mynd

Einar Þorsteinsson, formaður borgarráðs, segir ákvörðunina um að fjarlægja styttuna af séra Friðriki Friðrikssyni sem stendur á horni Lækjargötu og Amtmannsstígs hafa hlotið einróma samþykki í ráðinu.

Hann segir það hvorki liggja fyrir hvenær styttan verði tekin niður né hvað það verði sem komi í hennar stað.

Frétt af mbl.is

Styttan af séra Friðriki verður tekin niður

Unnið í samráði við KFUM og KFUK

Að sögn Einars litu hugmyndir um að fjarlægja ætti styttuna dagsins ljós í kjölfar háværrar opinberrar umræðu og gagnrýni innan samfélagsins í garð séra Friðriks, en fyrr í haust sendi Guðmundur Magnússon sagnfræðingur frá sér nýja ævisögu séra Friðriks þar sem hann greindi frá því að séra Friðrik hefði leitað á ungan dreng.

„Tillagan hlaut einróma samþykki í borgarráði,“ segir Einar. „Við höfum tekið okkur tíma til þess að vinna þetta mál vel í góðri samvinnu við KFUM og KFUK og óskuðum eftir því að þau kæmu inn á fund borgarráðs fyrir nokkrum vikum,“ bætir Einar við.

Hann segir samstarfið með KFUM og KFUK hafa verið einlægt og gott.

„Við óskuðum eftir formlegri umsögn frá þeim til þess að taka fyrir í ráðinu af því að það duldist engum að það var uppi umræða um það að styttan þyrfti að víkja.

Þau skiluðu síðan inn umsögn þar sem þau segja að þegar að styttur sem ætlað er að senda ákveðin skilaboð út í samfélagið eru farnar að senda önnur skilaboð út í samfélagið sé ekki óeðlilegt að þær víki. Þau höfðu mikinn skilning á þessari umræðu.“

Óljóst hvað komi í stað styttunnar

Einar, sem er fylgjandi ákvörðuninni, segist taka undir með KFUM og KFUK.

„Ég tek undir með þeim í þessu að í ljósi þessari umræðu hafi þýðing styttunnar breyst, bæði fyrir þá sem gáfu styttuna á sínum tíma og aðra, að þá sé ekki óeðlilegt að verða við þessari ósk að hún fari,“ segir Einar.

Ekki liggur fyrir hvenær styttunni verður steypt af stalli, en þegar því er lokið verður henni fundinn staður í listaverkageymslum Listasafns Reykjavíkur. Að sögn Einars er málið þó komið í ferli.

„Það er ekki komin áætlun um það [hvenær styttan verði tekin niður], en borgarráð fól umhverfis- og skipulagssviði að útfæra tillögur um það hvað kæmi í staðinn. Það er þá bara næsta skref að undirbúa það.“