Innlent | mbl | 24.11.2023 | 11:42

Áfram taldar líkur á eldgosi

Horft yfir hraunið við Grindavík og að Hagafelli. Líklegast er að kvika komi upp á svæðinu milli Hagafells og Sýlingarfells. mbl.is/Eggert Johannesson

Áfram eru taldar líkur á eldgosi yfir kvikuganginum við Svartsengi en í dag hafa tæplega 300 skjálftar mælst frá miðnætti.

Þetta kemur fram í tilkynningu frá Veðurstofu Íslands. Þar segir einnig:

„Í gær mældust um 650 jarðskjálftar nærri kvikuganginum og frá miðnætti í dag hafa tæplega 300 skjálftar mælst. Langflestir skjálftanna eru undir 1 að stærð en stærsti skjálftinn síðustu tvo daga mældist 2.7 að stærð nærri Hagafelli. Áfram dregur úr skjálftavirkni.“

Frétt af mbl.is

Landris merki um nýjan kvikugang?

Land heldur áfram að rísa

Þar segir einnig að GPS-mælar sýni að þensla heldur áfram við Svartsengi og að aflögun mælist enn nærri kvikuganginum.

Þó séu vísbendingar um að dragi úr hraða þenslunnar, sé horft á gögn síðustu viku. Flókið sé þó að túlka gögnin á þessu stigi.

Það er vegna þess að önnur ferli eins og sprunguhreyfingar tengdar jarðskjálftum og seigfjaðrandi svörun jarðskorpunnar vegna umbrota á svæðinu hafa áhrif á aflögunarmerkin.

Eldgos líklegast á svæðinu milli Hagafells og Sýlingarfells

Miðað við nýjustu samtúlkun allra gagna eru áfram taldar líkur á eldgosi yfir kvikuganginum. Líklegast er að kvika komi upp á svæðinu milli Hagafells og Sýlingarfells.

Á meðan að áfram dregur úr aflögun, skjálftavirkni og innflæði í kvikuganginn minnka líkurnar á eldgosi með tímanum að því er segir í tilkynningunni.