Um 170 jarðskjálftar mældust í hviðunni sem varð rétt austur af Sýlingarfelli og reið yfir í rúma klukkustund, en hún hófst rétt fyrir miðnætti.
Þetta kemur fram í tilkynningu Veðurstofu.
Skjálftarnir voru flestir smáir, undir 2 að stærð, en einn skjálfti mældist að stærðinni 3 miðað við fyrstu mælingar.
Varð hann við norðanverðan Sundhnúk, eins og mbl.is greindi frá fyrr í nótt.
Í tilkynningunni er tekið fram að hviður sem þessar hafi verið viðvarandi frá því landris hófst 27. október við Þorbjörn, þó nokkuð rólegt hafi verið síðustu daga.
Loks segir að engar vísbendingar séu um gosóróa að svo stöddu.