Nýr aðili tekur við af Arion banka í Leifsstöð

Nýr aðili mun reka fjármálaþjónustu á Keflavíkurflugvelli frá og með 1. febrúar á næsta ári.

Í tilkynningu frá Arion banka, sem sinnt hefur gjaldeyrisþjónustu á Keflavíkurflugvelli frá árinu 2016, segir að bankinn hafi sent inn metnaðarfullt tilboð varðandi áframhaldandi fjármálaþjónustu í útboði Isavia en annar rekstraraðili hafi orðið hlutskarpari.

Ekki liggur fyrir á þessari stundu hver muni taka við fjármálaþjónustunni. Edda Hermannsdóttir, samskiptastjóri Íslandsbanka, staðfesti í samtali við mbl.is að Íslandsbanki sé ekki að taka við þessari þjónustu og Karítas Ríkharðsdóttir, sérfræðingur í samskiptamálum Landsbankann, staðfesti sömuleiðis í samtali við mbl.is að Landsbankinn sé ekki að taka við hlutverki Arion banka.

• Blogga um frétt