Furða sig á samráðsleysi og mótmæla

Bæjarstjórn Hveragerðisbæjar undrast hálýstar yfirlýsingar í fjölmiðlum um virkjanaáform í Ölfusdal og samstarf Orkuveitu Reykjavíkur, Sveitarfélagsins Ölfuss og Títans án nokkurs samráðs eða aðkomu Hveragerðisbæjar að því máli.

Þetta kemur í bókun bæjarstjórnar Hveragerðis vegna málsins.

Frétt af mbl.is

Skoða nýjan virkjunarmöguleika í Ölfusdal

Þá segir, að Ölfusdalur sé að stærstum hluta í Hveragerði og að minnihluta í Ölfusi. Það sé furðulegt að fara af stað með slík áform án þess að Hveragerðisbær eigi aðkomu að málinu því ljóst er að virkjanaframkvæmdir muni hafa mest áhrif á íbúa Hveragerðisbæjar.

„Í þessu samhengi má nefna þau óþægindi sem íbúar Hveragerðis og nágrennis hafa orðið af borholum á Hellisheiði, með aukinni jarðskjálftavirkni vegna niðurdælingar, loftmengun og hávaðamengun sem berst íbúum þegar borholurnar eru látnar blása,“ segir í bókuninni. 

Frétt af mbl.is

Vill synda hratt í gegnum sírópsfen leyfisveitinga

Bent er á, að í Ölfusdal sé að finna fjölbreytta aðstöðu til útvistar og íþrótta. Megi þar nefna golfvöll, knattspyrnuvöll, sviflínu og gönguleiðir, þ.m.t. upphaf gönguleiðar inn í Reykjadal sem tugþúsundir ferðamanna fara á hverju ári. Í undirbúningi sé frekari uppbygging í Ölfusdal í þágu útivsitar og nálægðar við náttúruna.

Frétt af mbl.is

Áhrif á skjálftavirkni skoðuð frekar

„Umræður og ákvarðanir um virkjanir í og við náttúrperlur eins og Ölfusdal, og í næsta nágrenni við íbúabyggð, eru því mál sem þarf að vanda sérstaklega vel til og hafa víðtækt samráð við íbúa og ferðaþjónustuaðila.

Hveragerðisbær leggst gegn því að rannsóknarleyfi verði veitt í Ölfusdal fyrr en náið og eðlilegt samráð hefur verið haft við sveitarfélagið og íbúa þess um þessa framkvæmd. Því er beint til umræddra aðila og stjórnvalda að tryggja aðkomu Hveragerðisbæjar að öllum áformum um virkjanaframkvæmdir í Ölfusdal áður en nokkrar ákvarðanir verða teknar um rannsóknarleyfi eða framkvæmdir,“ segir í bókuninni. 

• Blogga um frétt