„Skítkalt“ að setja upp stjörnuna

„Það var skítkalt þarna uppi. Það er alltaf kaldara í 38 metrum heldur en niðri á jörðinni,” segir Lúðvík Þorsteinsson, starfsmaður Sementsverksmiðjunnar á Akranesi.

Hann og samstarfsmaður hans fylgdu áratuga langri hefð í gærmorgun þegar þeir settu upp jólastjörnu fyrir ofan sementsgeyma verksmiðjunnar. Tilgangurinn er að sjálfsögðu að koma Skagamönnum í jólaskapið.

Átta ár eru liðin síðan blaðamaður spurði Lúðvík síðast út í stjörnuna og síðan þá hefur þessi fallega hefð haldist óslitin. 

Frétt af mbl.is

Jólaskapið kemur með stjörnunni

Þurftu að sæta lagi 

Verkefnið tók um 40 til 50 mínútur, frá því að krani kom á svæðið og þangað til stjarnan var komin upp. Beðið var eftir logni, bæði vegna kranans og vegna þess að stjarnan er tiltölulega létt og sveiflast því mikið til í vindi.

„Það þarf að sæta lagi með veður,” segir Lúðvík.

Nokkur ár eru liðin síðan ný jólastjarna tók við af þeirri gömlu. Venjulegar ljósaperur voru í þeirri síðarnefndu og þurfti Lúðvík stundum að fara aftur upp á geymana nokkrum sinnum á hverri aðventu til að skipta um perur með tilheyrandi veseni. Nýja stjarnan samanstendur af led-perum, með tilheyrandi orkusparnaði, og á henni eru átta til tíu seríur.

Frétt af mbl.is

Fall skorsteinsins séð úr lofti

Jólastjarnan er komin á sinn stað. Ljósmynd/Aðsend

Engin stjarna = engin jól

„Þetta pumpar aðeins upp desember að fá að standa í svona brasi,” bætir hann við, spurður út í þessa hefð. „Maður kemst ekki í jólaskap fyrr en stjarnan er komin upp. Ef hún fer ekki upp verða engin jól.”

Lúðvík er einn fjögurra starfsmanna Sementsverksmiðjunnar. Í hópnum eru þrír karlmenn og ein kona. Þar fyrir utan er einn framkvæmdastjóri.

Hann segir það vissulega sérstakt hve mikil breyting hefur orðið á Sementsreitnum svokallaða undanfarin ár en þar er uppbygging hafin á íbúðarhúsnæði.

Frétt af mbl.is

Fjölgar um 3.000 á Skaga

„Þetta var gömul verksmiðja með alls konar tól og tæki sem fylgdu sem eru ekki í dag. Þetta er betra vinnuumhverfi núna, svæðið er orðið hreint og fínt og bærinn hefur gert vel í þeim efnum.”

• Blogga um frétt