Innlent | mbl | 4.12.2023 | 20:14

Hver væri draumastaðan að mati Páls?

Páll Winkel fangelsismálastjóri. mbl.is/Hari

Í nýrri stjórnsýsluúttekt Ríkisendurskoðunar á málefnum Fangelsismálastofnunar er að finna ýmiss atriði sem Ríkisendurskoðun segir betur mega fara. Eitt af stóru atriðunum þar er aðstaðan á Litla-Hrauni, sem er jafnvel talin svo slæm að það ógni heilsu starfsfólks og fanga.

Þar horfir þó til betri vegar, en tilkynnt hefur verið að byggja eigi nýtt fangelsi á Litla-Hrauni í staðinn fyrir núverandi fangelsi. Það eru þó um fimm ár í að slíkt fangelsi liti dagsins ljós, gangi áætlanir eftir.

Í skýrslunni er einnig gagnrýnt að uppbygging Litla-Hrauns hafi aldrei einkennst af heildar- eða langtímasýn um starfsemina. Er bent á að aðeins sé vistunarúrræði fyrir konur á Hólmsheiði og fangelsinu Sogni, en Ríkisendurskoðun telur varasama ráðstöfun að vista konur til lengri tíma á Hólmsheiði, enda sé það öryggisfangelsi og skammtímaúrræði. Þá sé við stækkun á Sogni sé ekki komið að fullu til móts við ábendingar sem tryggi konum úrræði við hæfi, meðal annars með fullkomnum aðskilnaði kynja.

Frétt af mbl.is

Svört skýrsla um málefni Fangelsismálastofnunar

Til stendur að nýtt fangelsi í stað Litla-Hrauns verði með um 100 rými fyrir fanga. Þá er unnið að stækkun á Sogni, en er það nóg? Ef fangelsismál yrðu sett í efsta forgang, hvað myndi yfirmaður fangelsismála vilja sjá gert þegar kæmi að húsnæðiskosti fangelsa á Íslandi?

Spurður hver væri draumastaða ef hægt væri að koma upp fangelsis- og vistunarúrræðum miðað við núverandi og framtíðar þörf, án þess að þurfa að taka mið af mögulegum kostnaði, segir Páll Winkel fangelsismálastjóri að þrennt kæmi þar til. Ítrekar hann að í þessari draumastöðu þyrfti einnig að fylgja fjármagn til mönnunar, en eins og greint hefur verið frá næst ekki full nýting í núverandi fangelsum vegna fjármögnunarvanda.

Frétt af mbl.is

Nýta ekki fjölda rýma vegna skorts á fjármagni

Fremst í röðinni segir Páll að byggja nýtt fangelsi þar sem Litla-Hraun sé, en í stað um 100 klefa segir hann að hann myndi horfa til um 150 klefa.

Í öðru lægi segist hann fagna þeim áformum sem séu í gangi með stækkun á Sogni, en að til viðbótar þurfi sérstakt fangelsi og áfangaheimili fyrir konur þar sem veitt yrði þjónusta sem auki líkur á að fólk láti af afbrotahegðun. Á hann þar við sálfræðinga, vímuefnaráðgjafa og félagsráðgjafa, auk fangavarða. Segir hann að samtals væri um 10 stöðugildi að ræða fyrir 10-15 rými í lokuðu fangelsi og 10-15 rými í opnu fangelsi.

Að lokum nefnir hann að fara þyrfti í endurbætur á Kvíabryggju.