Innlent | mbl | 4.12.2023 | 18:01

Lögð á ráðin um vatnsframleiðslu

Karl Gauti Hjaltason, lögreglustjóri í Vestmannaeyjum, fer yfir þær leiðir sem Eyjamenn telja tækar eftir að vatnslögn til Eyja laskaðist illa í nóvember. Samsett mynd

„Þetta eru eiginlega tvö mál hjá mér, aðgerðin og svo vatnsleysið sem er almannavarnamálið,“ segir Karl Gauti Hjaltason, lögreglustjóri í Vestmannaeyjum, í samtali við mbl.is en eins og mbl.is greindi frá í nóvember skaddaðist vatnslögnin til Vestmannaeyja að kvöldi 17. nóvember þegar akkeri Hugins VE, sem var á leið til hafnar af kolmunnaveiðum, losnaði og festist í lögninni.

Frétt af mbl.is

Vatnslögnin stórskemmd

Segir lögreglustjóri, hvað vatnsleysið snertir, að fjöldi lausna liggi á borðinu og nú sé unnið að því að tryggja að ekki komi til neyðarástands vegna skorts á neysluvatni. „Ein lausnin er að flytja vatn með gámum, skipum eða tankbílum og svo auðvitað drykkjarvatn, það er númer eitt. Númer tvö er að gera við leiðsluna í skyndi ef hún fer í sundur, einhverja reddingu á því, auk þess sem við erum líka að skoða gamla lögn, og í þriðja lagi erum við að skoða framleiðslu á vatni sem getur verið skiljun og við erum að vinna í því að fá búnað til að skilja vatn í nokkuð stórum stíl,“ segir Karl Gauti frá.

Allt að 500 tonnum á sólarhring

Aðspurður kveður hann það fara eftir umfangi og afköstum búnaðarins hve stórum hluta vatnsþarfar Eyjamanna hann gæti staðið undir, „það fer eftir því hve stór tækjabúnaðurinn er, vonandi er ekki langt í það, kannski einhverjar vikur, að við getum mætt grunnþörf í hitaveitu og neyslu, almennum heimilisnotum“, segir Karl Gauti.

Einn gámur með téðum búnaði sé á leiðinni og möguleiki á fleirum. „Ein svona eining er að framleiða allt að 500 tonnum á sólarhring af vatni sem er nóg til að halda heitu og gífurleg framför frá því sem við vorum að horfa á fyrir tveimur vikum. Hér er nægt vatn eins og stendur og engin neyð í gangi,“ segir hann.

Búið sé að treysta vatnslögnina sem laskaðist og setja á hana stög og festingar svo hún haldi jafnvel þótt veður gerist válynd. „En hún er mjög óstabíl og enginn veit hve mikið hún þarf til að fara í sundur,“ segir Karl Gauti Hjaltason, lögreglustjóri í Vestmannaeyjum, að lokum.