Segir upplýsingafulltrúa borgarinnar oftalda

Eva Bergþóra Guðbergsdóttir, samskiptastjóri Reykjavíkurborgar, segir að það ekki sé rétt að 17 upplýsingafulltrúar starfi hjá Reykjavíkurborg heldur séu þeir tíu. 

Er hún þar að vísa til ræðu Mörtu Guðjónsdóttur, borgarfulltrúa Sjálfstæðisflokks, sem sagði 17 upplýsingafulltrúa starfa hjá borginni í ræðu í borgarstjórn sem sagt var frá á mbl.is. 

Frétt af mbl.is

Borgin með 17 upplýsingafulltrúa og ritstjórn

Eva fer fyrir samskiptateymi borgarinnar sem tilheyrir skrifstofu Ráðhússins. Hún segir tíu upplýsingafulltrúa starfa hjá borginni. Tveir hjá samskiptateymi Ráðhússins og átta hjá sviðum borgarinnar. Þá hafi tveimur upplýsingafulltrúum verið sagt upp á árinu en þeir tilheyrðu skrifstofu samskiptateymisins. 

Verkefnastjórar og myndbandsgerð

Að auki starfi sex starfsmenn hjá samskiptateymi Ráðhússins sem ekki sé rétt að nefna upplýsingafulltrúa líka að sögn Evu. Þar af eru þrír verkefnastjórar viðburða á borð við Menningarnótt, ljósmyndari, vefstjóri, einn sem sinnir efnisgerð og einn sem sinnir myndbandsgerð til fræðslu.

Í samskiptateymi borgarinnar í Ráðhúsinu starfa tveir upplýsingafulltrúar, en aðrir í samskiptateymi sinna annars konar verkefnum. mbl.is/Eggert Jóhannesson

 „Þess má geta að starf upplýsingafulltrúa hefur tekið miklum breytingum og snýr að miklu leyti að almennri upplýsingagjöf til notenda þjónustu Reykjavíkurborgar,“ segir í skriflegu svari frá Evu.

• Blogga um frétt