Slökkviliðið á höfuðborgarsvæðinu var kallað út vegna elds í gróðri í Mosfellsbæ við Vesturlandsveg rétt fyrir klukkan eitt í nótt.
Eldurinn kviknaði skammt frá slökkviliðsstöðinni í Mosfellsbæ. Hún var því fljót á staðinn og náði að slökkva eldinn um tíu mínútum eftir að útkallið barst.
Að sögn varðstjóra hjá slökkviliðinu á höfuðborgarsvæðinu er talið líklegt að kveikt hafi verið í gróðrinum. Eldurinn logaði á um 200 fermetra svæði. Engin hætta skapaðist, enda tók skamman tíma að slökkva eldinn.