Félag íslenskra flugumferðarstjóra fundaði í dag með samninganefnd Samtaka atvinnulífsins í húsnæði ríkissáttasemjara, en flugumferðarstjórar hafa boðað verkföll í tvígang í næstu viku, dagana 12. og 14. desember, sex klukkutíma í senn frá klukkan fjögur á morgnana til klukkan tíu, í aðflugssvæðinu í kringum Keflavík og Reykjavík.
„Fundurinn gekk ágætlega og stóð í um það bil tvo tíma eða svo,“ segir Arnar Hjálmsson, formaður Félags flugumferðarstjóra, í samtali við mbl.is og bætir því við að staðan sé þó nánast óbreytt eftir fundinn. „Það voru svona einhverjar þreifingar og verið að reyna að finna einhverja þræði,“ segir formaðurinn.
Næsti fundur er boðaður á mánudaginn og segir Arnar aðspurður að ekki sé tilefni til að hætta við vinnustöðvanir á þriðjudag og fimmtudag eftir það sem fram kom á fundi dagsins. „Við erum bara í miðjum viðræðum og það kemur í ljós hver framvindan verður, kannski verða einhver samtöl um helgina líka, ég bara veit það ekki,“ segir hann.
Myndirðu segja að fundurinn í dag hafi verið jákvæður eða neikvæður að þinni tilfinningu?
„Jákvæður,“ svarar Arnar um hæl.
Verði af fyrirhugaðri vinnustöðvun stöðvast allt flug á áðurnefndum tíma að undanskildu sjúkraflugi og öllu flugi á vegum Landhelgisgæslunnar.
Kjarasamningar flugumferðarstjóra hafa verið lausir frá 1. október síðastliðnum og hafa samningsaðilar ekki náð samkomulagi um nýjan samning eins og fram kemur hér að ofan.