Innlent | mbl | 8.12.2023 | 21:53

Skoða aukið öryggi fyrir æðstu ráðamenn

Bjarni átti að flytja lokaávarp á fundinum, sem var síðan aflýst í kjölfar glimmerkastsins. Ljósmynd/Aðsend

Karl Steinar Valsson, yfirlögregluþjónn alþjóðasviðs ríkislögreglustjóra, segir að mótmælendurnir sem skvettu glimmeri yfir Bjarna Benediktsson utanríkisráðherra á ráðstefnu í dag hafi gengið of langt. Lögreglan skoðar nú hvort auka eigi öryggisráðstafanir í kringum æðstu ráðamenn í landinu.

Bjarni átti að flytja lokaávarp á hátíðarfundi sem var haldinn í Veröld, húsi Vigdísar, í tilefni af 75 ára afmæli mannréttindayfirlýsingar Sameinuðu þjóðanna. Fundinum var þó aflýst í kjölfar þess að mótmælendur skvettu rauðu glimmeri á utanríkisráðherrann í því skyni að mótmæla framgöngu Íslands í tengslum við stríðið á Gasasvæðinu.

Frétt af mbl.is

Köstuðu rauðu glimmeri á Bjarna

„Við höfum að undanförnu verið að fara yfir þessi öryggismál,“ segir Karl Steinar í samtali við mbl.is sem segir að nú sé enn fremur tilefni til þess að auka öryggi en bendir aftur á móti á að engar ákvarðanir hafi verið teknar.

Frétt af mbl.is

Myndskeið: Glimmeri kastað yfir Bjarna

Glimmerkastið „á engan veginn viðeigandi“

„Við búum í frekar friðsælu umhverfi,“ segir Karl og bendir á að í flestum löndum séu æðstu ráðamenn með talsvert mikla gæslu í kringum sig. „Hingað til hafa menn ekki talið ástæðu til þess að vera með það [á Íslandi].“

„Þetta er bara í skoðun eftir þá atburðarás sem við sáum þarna. Þetta er náttúrulega engan veginn viðeigandi,“ bætir hann við.

Frétt af mbl.is

Bjarni: „Ráðstefnan var yfirtekin af mótmælendum“

Karl Steinar Valsson. mbl.is/Eggert Jóhannesson

Of langt gengið

Aðspurður segir Karl að of langt hafi verið gengið þegar glimmeri var kastað yfir utanríkisráðherra.

„Við viljum að sjálfsögðu finna flöt á því að fólk geti tjáð skoðanir sínar og haft friðsamleg mótmæli. En við þurfum auðvitað að velta því fyrir okkur hvernig við túlkum það – hvernig virðum við líka frelsi annarra sem eru í kringum okkur?,“ segir hann.

Hann nefnir að hingað til hafi íslenskir ráðamenn almennt getað sinnt sínum störfum án þess að þörf væri á mikilli löggæslu í kringum þá. „Vonandi er það nú ekki það sem við förum að sjá.“

Bjarni var þakin rauðum lit. Ljósmynd/Aðsend

Stormasöm tíð Bjarna í utanríkisráðuneytinu

Efnt hefur verið til margra mótmæla hér á landi í tengslum við stríðið á Gasaströndinni. Mótmælin hafa oftast verið við ráðherrabústaðinn eða utanríkisráðuneytið.

Bjarni tók við embætti utanríkisráðherra aðeins viku eftir að stríðið hófst. Þá skipti hann um embætti við Þórdísi Kolbrúnu R. Gylfadóttur, núverandi fjármálaráðherra, í kjölfarið á afsögn sinni sem fjármálaráðherra.

Frétt af mbl.is

Bjarna heitt í hamsi

Sá stutti tími sem Bjarni hefur setið í ráðuneytinu hefur verið stormasamur. Sem dæmi má nefna afstöðu Íslands á allsherjarþingi Sameinuðu þjóðanna um að sitja hjá í atkvæðagreiðslu um vopnahlé á Gasasvæðinu, sem var afar umdeild á sínum tíma.

Frétt af mbl.is

Þurfti ekki sérstakt samráð: „Ég tók af skarið“

Einnig vakti það athygli í byrjun nóvember þegar norskur blaðamaður spurði Bjarna út í mannskæða loftárás Ísraelshers á flóttamannabúðir í Jabaliya á Gasasvæðið. Utanríkisráðherrann virtist þá ekki tilbúinn til að samþykkja fullyrðingu blaðamannsins um að árás hefði verið gerð.