Samstöðufundur með Palestínu á Akureyri

Á þriðja hundrað manns komu saman á Ráðhústorginu á Akureyri í dag til að sýna samstöðu með Palestínu.

Ragnar Sverrisson, einn skipuleggjanda viðburðarins, segir mætinguna hafa verið frábæra enda snerti málefnið marga.

20.000 drepnir „Það er öll Akureyri“

Svavar Knútur tók lagið fyrir viðstadda í upphafi og í lok fundarins og voru kerti tendruð á torginu sem mynduðu friðartákn. 

Var yfirlýsing fundarins lesin upp af Ingu Völu Gísladóttur og var síðan einnar mínútu þögn til að minnast þeirra sem látist hafa í átökunum. 

„Á aðeins 60 dögum, hafa 20 þúsund manns verið drepin, meira en 8 þúsund af þeim voru börn,“ sagði í yfirlýsingunni. „Ég bið ykkur að taka augnablik til að gera ykkur í hugarlund hversu margir 20 þúsund eru. Það er öll Akureyri.„

Að sögn Ragnars voru síðan tvö ljóð lesin upphátt fyrir viðstadda: Slysaskot í Palestínu eftir Kristján Einarsson frá Djúpalæk og Ef ég verð að deyja eftir Refaat Alareer, sem að Bragi Páll Sigurðarson íslenskaði á dögunum í kjölfar andláts Alareer.