Stekkjastaur lagður af stað til byggða

Eflaust eru flest börn búin að koma skónum fyrir uppi í glugga enda von á fyrsta jólasveininum í nótt.

Stekkjastaur Leppalúðason verður venju samkvæmt fyrstur jólasveinanna þrettán. Ekki náðist á hann við vinnslu fréttarinnar enda á hann eflaust fullt í fangi með undirbúning fyrir nóttina.

Þó hafa borist frásagnir af því að Stekkjastaur hafi sést á vappi og því talið að hann sé lagður af stað til byggða. 

Ekki heyrst af honum að sjúga ær 

Stekkur er gamalt heiti á sérstakri fjárrétt og þaðan dregur sveinninn nafn sitt.

Jóhannes úr Kötlum orti:

Stekkjastaur kom fyrstur,
stinnur eins og tré.
Hann laumaðist í fjárhúsin
og lék á bóndans fé.

Hann vildi sjúga ærnar,
-þá varð þeim ekki um sel,
því greyið hafði staurfætur,
-það gekk nú ekki vel.

Stekkjastaur kemur fyrstur jólasveina til byggða.

Þannig hljómar jólasveinavísan um Stekkjastaur. Eins og sjá má í vísu Jóhannesar reyndi hann oft að sjúga ærnar í fjárhúsum bænda hér áður fyrr. Minna hefur farið fyrir frásögnum af því hin seinni ár og eftir því sem mbl.is kemst næst hafa engar tilkynningar um slíkt borist frá bændum. 

• Blogga um frétt