„Sjórinn mokaði stórgrýti inn á planið“

„Það er allt út í sandi og drullu og ógeði þarna í kring. Þetta er svolítið eins og sprengjusvæði.“

Þetta segir Ágúst Bjartmarsson, yfirverkstjóri Vegagerðarinnar á Vík í Mýrdal, en sjór gekk inn á bílaplanið við Veitingahúsið Svörtu fjöruna í Reynishverfi nærri Reynisfjöru í stórstreymi í nótt. Þá skemmdist vegurinn út á Reynisfjöru töluvert í áganginum.

„Sjórinn tók skarð í veginn hjá okkur og mokaði stórgrýti inn á planið. Það þarf að hreinsa það út með einhverjum vélum þannig að hægt verði að keyra bíl inn á það.“

Eins og sjá má er vegurinn töluvert skemmdur eftir áganginn í nótt. mbl.is/Jónas Erlendsson

Ágúst segir húsið sjálft ekki í hættu þar sem það standi upp á eins konar púða. Þá segir hann að hann hafi ekki heyrt af öðrum skemmdum vegna stórstreymis og að varnargarðar hafi haldið í Vík þó mikið hafi mætt á.

„Þetta gerist á einhverra ára fresti. Planið er venjulega rennislétt en nú eru bara grjót á stærð við körfubolta um allt.“

Ágúst segir að stærsta streymi sé spáð á morgun þannig að það verði ekkert farið í lagfæringar fyrr en eftir morgundaginn.

„Við setjum bara lokun á neðra planið og byrjum að laga vegskemmdirnar en svo ætla landeigendur að laga planið eftir morgundaginn.“

Horft yfir túnið fyrir neðan bæinn Garða og sumarhúsin í landi Garða. Veitingahúsið Svörtu fjöruna má sjá ofarlega hægra megin á myndinni. mbl.is/Jónas Erlendsson

• Blogga um frétt