Land náð sömu hæð og fyrir eldgosið
Setja bókamerki
Land hefur nú náð sambærilegri hæð og mældist rétt fyrir eldgosið 18. desember. Þetta sýna tölur GPS-mæla við Svartsengi og heldur land áfram að rísa.
Fram kemur í tilkynningu frá Veðurstofu Íslands og segir þar að líkur á eldgosi hafi því aukist.
„Hraði landrissins síðan 18. desember hefur haldist nokkuð stöðugur sem er frábrugðið stöðunni fyrir síðasta gos, en þá hægðist á landrisi vikurnar fyrir gosið. Erfitt er þó að fullyrða um að landris hægi á sér í aðdraganda næsta goss, en það hefur þó verið tilfellið í gosum sem hafa orðið á Reykjanesskaga síðustu ár og var einnig notað til viðmiðunar í Kröflueldum,“ segir tilkynningunni.
Óvíst hversu mikinn kvikuþrýsting þarf
Þá segir þar að óvissa sé um hversu mikill kvikuþrýstingur þarf að byggjast upp áður en kvika fer að leita upp á yfirborðið.
Landrisinu nú fylgir ekki eins mikil skjálftavirkni og áður. Ástæða þess er að í atburðunum 10. nóvember og 18. desember losnaði um mikla spennu á svæðinu þegar kvika braut sér leið í jarðskorpunni. Í aðdraganda síðasta goss urðu allnokkrir skjálftar yfir 3 og einn yfir 4 að stærð. Samfara áframhaldandi landrisi er líklegt að skjálftavirkni aukist aftur.
Líklegast þykir sérfræðingum Veðurstofunnar að það gjósi aftur á Sundhnúkagígaröðinni, á milli Stóra-Skógfells og Hagafells. Mikilvægt er að rifja upp að kvikuhlaup enda ekki alltaf í eldgosi, eins og dæmi eru um í tengslum við virknina við Fagradalsfjall og eins í Kröflueldum.
Hulda saksóknari: „Tökum þetta ekki til greina“
Gasmengun gæti borist yfir höfuðborgarsvæðið
Dregið úr gosóróa
Í kappi við tímann að reyna að afstýra verkfalli
„Höfum sloppið bærilega með skaða af þessu gosi“
„Við höldum áfram þangað til við erum búin“
„Sá vegur er bæði háll og myrkur“