Gamla árið kvatt með brennum víða

Gamla árið verður kvatt með brennu víða á höfuðborgarsvæðinu, þó ekki í Kópavogi eða Hafnarfirði. Akureyringar halda upp á brennuna á nýjum stað á meðan tíu brennur munu loga í Reykjavík í kvöld.

Áramótabrenna verður ekki tendruð í Kópavogsdal í kvöld, segir í tilkynningu frá Kópavogsbæ. Svæðið er ekki er lengur talið heppilegur staður fyrir brennu vegna öryggis- og umhverfissjónarmiða.

Þetta er annað árið í röð þar sem brenna er ekki haldin í Kópavogsdal. Hjálparsveit skáta stendur aftur á móti fyrir flugeldasýningu á gamlárskvöld klukkan níu. 

Tvær brennur í Garðabæ en engin í Hafnarfirði

Tvær áramótabrennur verða í Garðabæ, ein við Sjávargrund og önnur á Álftanesi, samkvæmt tilkynningu frá bænum.

Ásvell­ir í Hafnarfirði eru ekki leng­ur taldir vera heppi­leg­ur staður fyr­ir ára­móta­brennu en þar til í fyrra hafði áramótabrenna verið haldin þar árlega.

Seltjarnarnesbær stendur fyrir brennu á Valhúsahæð og í Mosfellsbæ verður ára­móta­brenna hald­in neð­an Holta­hverf­is við Leir­vog­inn. Þrettándabrenna verður haldin á sama stað.

Tíu brennur verða haldnar í Reykjavík í kvöld: við Ægisíðu, í Skerjaf­irði, við Suður­hlíðar, í Laug­ar­dal­, við Geirs­nef, við Jafna­sel, við Rauðavatn, við Gufu­nes, við Klé­berg, og við Úlfars­fell.

Frétt af mbl.is

Tíu áramótabrennur í Reykjavík

Brennt á Jaðri Akureyrar

Vegna breyttra aðstæðna og framkvæmda á svæðinu við Réttarhvamm, þar sem áramótabrenna hefur verið undanfarin ár, var ákveðið að breyta um staðsetningu, að því er bæjaryfirvöld tilkynna.

Brennan verður á auðu og óbyggðu svæði á Jaðri nokkru sunnan við golfskálann.

Enn verður árleg flugeldasýning á gamlárskvöld á sínum stað skammt frá höfuðstöðvum Norðurorku.

Brennan verður á Jaðri. Kort/Akureyrarkaupstaður

Fresta brennunni vegna gulrar viðvörunar

Eins og mbl.is hefur greint frá tekur gul viðvörun gildi kl. 22 á Suðausturlandi.

Hinni árlegu áramótabrennu Björgunarsveitar Hornafjarðar verður fyrir vikið frestað til annars kvölds, að því er fram kemur á Facebook-síðu sveitarinnar.

• Blogga um frétt