Frídagar hitta alltaf á virka daga í ár

Árið 2024 brosir við ferðaþyrstum Íslendingum þar sem frídagar hitta alltaf á virka daga, utan þeirra frídaga sem í eðli sínu falla alltaf á ákveðinn dag vikunnar.

Baráttudagur verkalýðsins, 1. maí, ber upp á miðvikudegi. Þjóðhátíðardagurinn 17. júní hittir á mánudag svo þá fá landsmenn lengri helgi. 

Við vorgleðina bætast svo fimmtudagsfrídagarnir tveir, sumardagurinn fyrsti, 25. apríl, og uppstigningardagur, 9. maí. Þrjár vikur í röð verður því vinnuvikan aðeins fjórir dagar. 

Páskarnir veita landsmönnum fimm daga frí eins og alltaf. Skírdagur er 28. mars og páskadagur því 31. mars.

Engin atvinnurekenda jól í ár

Þá verður aðfangadagur jóla á þriðjudegi, jóladagur á miðvikudegi, annar í jólum á fimmtudegi og gamlársdagur á þriðjudegi. Nýársdagur er því á miðvikudegi. 

Þingflokkur Pírata vakti athygli á því þarsíðustu jól að launþegar hafi þá aðeins fengið einn lögbundinn frídag alla jólahátíðina og vildi því að tapaðir frídagar færðust á næsta virka dag. Ljóst er að lítil þörf verður fyrir slíkar tilfæringar í ár.

Frétt af mbl.is

Vilja að tapaðir frídagar færist á næsta virka dag

• Blogga um frétt