Munaði litlu að krani félli á bíl á Hringbraut

Járnvirki hrundi af vörubíl í aðrein við Hringbraut um skömmu eftir klukkan 14:00 í dag. Sjónarvottur segir litlu hafa munað að hlassið félli á mannaða bifreið. 

Í samtali við mbl.is segir Guðbrandur Sigurðsson, aðstoðaryfirlögregluþjónn í umferðardeild lögreglunnar á höfuðborgarsvæðinu, að lokað hafi verið fyrir umferð á meðan á aðgerðum viðbragðsaðila stendur. Opnað hefur verið fyrir umferð á ný. 

Hann segir heppni að ekki hafi orðið slys á fólki við atvikið. Tjón sé á ljósastaur og umferð hafi verið hindruð í vesturátt vegna kranans og steina sem einnig féllu á veginn. 

Munaði hársbreidd

Kristinn Hrafnsson fjölmiðlamaður var annar ökumaðurinn til að koma að slysinu og smellti myndum af vettvanginum. Hann segir hársbreidd hafa munað að konan í bifreiðinni á undan honum hefði orðið undir krananum. 

„Hún hefði ekki þurft að kemba hærurnar blessunin, það var það mikill þungi á þessu að þetta tók ljósastaur og braut hann saman eins og pappír,“ segir Kristinn og bætir við að einnig hafi kraninn dottið úr nokkurri hæð. 

Fréttin hefur verið uppfærð.