Innlent | mbl | 5.1.2024 | 14:05 | Uppfært 18.3.2024 18:40

Líkur aukast á kvikuhlaupi og eldgosi

Líkur aukast á kvikuhlaupi og eldgosi á Sundhnúkagígaröðinni á milli Stóra-Skógfells og Hagafells. mbl.is/Eggert Jóhannesson

Vísbendingar eru um að kvikuþrýstingur sé að byggjast upp við Svartsengi og þar með aukast líkur á nýju kvikhlaupi og einnig eldgosi. Uppfært hættumatskort verður birt seinna í dag.

Þetta kemur fram í tilkynningu frá Veðurstofu Íslands.

Frétt af mbl.is

Landrisið heldur áfram og aldrei verið meira

Stærsti skjálftinn norður af Hagafelli

Í tilkynningunni segir jafnframt að ekki sé útilokað að þetta sé vísbending um að það dragi úr kvikuinnflæði. Áfram dregur úr hraðanum á landrisinu við Svartsengi en það var staðfest með GPS-gögnum sem voru til umræðu á samráðsfundi vísindafólks á vegum Veðurstofu Íslands í morgun.

Tæplega 490 skjálftar hafa átt sér stað við kvikuganginn frá því á þriðjudag og þar af 14 yfir 1,0 að stærð. Stærsti skjálftinn á þessu tímabili mældist 1,8 að stærð norður af Hagafelli.

Frétt af mbl.is

Vísbendingar um aukinn kvikuþrýsting

Skjálftar við Trölladyngju tengjast ekki kvikuhreyfingum

Á miðvikudag riðu yfir skjálftar sem mældust 4,3 að stærð annars vegar og 3,5 að stærð hins vegar nærri Trölladyngju. Fjölmargir eftirskjálftar fylgdu og hafa um 900 skjálftar mælst á svæðinu.

Jarðskjálftarnir við Trölladyngju urðu á þekktri jarðskjálftasprungu þar sem stærri skjálftar hafa orðið nokkrum sinnum áður. Engin merki eru um að þeir tengist kvikuhreyfingum beint, eins og segir í tilkynningunni.

Frétt af mbl.is

Skjálftarnir líklega vegna spennubreytinga

Gjósi líklegast á Sundhnúkagígaröðinni

Þær miklu landbreytingar sem hafa orðið á Reykjanesi í tengslum við kvikugangana í Fagradalsfjalli, landris við Svartsengi, kvikuganginn við Sundhnúk í nóvember og eldgosið skömmu fyrir jól hafa mælst á öllu vestanverðu Reykjanesinu og hafa áhrif á skjálftavirkni á svæðinu öllu.

Þá segir í tilkynningunni að mat vísindamanna sé áfram að ef til eldgoss komi, sé líklegast að það gjósi aftur á Sundhnúkagígaröðinni á milli Stóra-Skógfells og Hagafells.

„Það er hins vegar mikilvægt að rifja upp að kvikuhlaup enda ekki alltaf í eldgosi eins og dæmi eru um í tengslum við virknina við Fagradalsfjall og eins í Kröflueldum,“ eins og segir í tilkynningu Veðurstofu.