Þungur áfellisdómur yfir matvælaráðherra
Setja bókamerki
Þingflokkur Samfylkingarinnar hefur ekki ákveðið hvort hann muni krefjast afsagnar Svandísar Svavarsdóttur matvælaráðherra vegna álits umboðsmanns Alþingis, sem segir að hún hafi með ólögmætum hætti sett á tímabundið hvalveiðibann í sumar.
Jóhann Páll Jóhannsson, þingmaður Samfylkingarinnar, segir við mbl.is að álitið komi sér í raun ekki á óvart.
„Framganga ráðherra hefur slegið mig mjög illa. Þetta álit er þungur áfellisdómur yfir vinnubrögðum ráðherra í þessu máli.“
Fyndist þér eðlilegt að matvælaráðherra segði af sér?
„Þetta er eitthvað sem við í þingflokknum höfum ekki rætt og fyrst og fremst eitthvað sem stjórnarmeirihlutinn þarf að svara,“ svarar Jóhann Páll, sem tekur einnig fram að ríkisstjórnin í heild sinni njóti ekki trausts Samfylkingarinnar. Þá hefur flokkurinn heldur ekki ákveðið hvort hann myndi kjósa með hugsanlegri vantrauststillögu.
Dapurleg málsvörn matvælaráðherra
Jóhann Páll kallar það „dapurlegt“ að fylgjast með málsvörn Svandísar eftir að álitið birtist. Svandís hefur talað um að umboðsmaður noti vægt orðalag og sagt að framganga sín hafi í raun ekki verið lögbrot.
Ákvörðunin um að banna hvalveiðar tímabundið átti sér ekki nógu skýra stoð í 4. gr. laga nr. 26/1949 um hvalveiðar auk þess sem brotið var gegn meðalhófsreglu.
„Þetta er bara ofboðslega afgerandi niðurstaða um að athafnir ráðherra hafi ekki verið í samræmi við lög og að meðalhófs hafi ekki verið gætt,“ segir Jóhann.
Svandís sagði sér til varnar að hvalveiðilögin væru gengin sér til húðar. Það er sennilega rétt, að mati Jóhanns er það „hlutverk ráðherra að hafa forgöngu um breytingu á lögum, ekki að brjóta þau lög sem gilda í landinu“.
/frimg/1/13/54/1135498.jpg)
Svandís hafi víst haft kosta völ
Svandís bar einnig fyrir sig að hún hefði haft engra kosta völ en að banna hvalveiðar tímabundið. Jóhann bendir á að það sé ekki alveg rétt.
„Umboðsmaður Alþingis bendir sérstaklega á að það séu engin merki um að ráðherra hafi átt samskipti við Hval hf. um veiðiaðferðir og veiðibúnað, það er að segja að leita leiða til að ná markmiðum dýravelferðalaga með minna íþyngjandi úrræðum,“ segir hann.
Spurður hvort honum þyki að matvælaráðherra ætti á einhverja vegu að axla ábyrgð svarar Jóhann Páll:
„Það er óumflýjanlegt þegar það kemur afgerandi niðurstaða frá eftirlitsaðila um að ráðherra hafi brotið lög.“
Hann telur þó að ríkisstjórnin verði sjálf að greiða úr þeim málum.
Einar skorar á næstu ríkisstjórn
Úlfar: Heppileg tímasetning á gosinu
Búseta skortir byggingarlóðir
Átti ekki að láta pirring bitna á sjúklingi
Þórarinn: Tafir á höfuðborgarsvæðinu ekki minni
Beint: Eldgos hafið við Stóra-Skógfell
/frimg/1/53/5/1530526.jpg)
Yfirvöld láta ekkert uppi: Sænsk herskip kölluð út
„Erum í miðri hrinu“: Styttist í Eldvörp