Innlent | Morgunblaðið | 8.1.2024 | 6:00 | Uppfært 9:57

Stjórnin í hættu nema Svandís skipti um stól

Bjarni Benediktsson, utanríkisráðherra, Svandís Svavarsdóttir matvælaráðherra og Þórdís Kolbrún Reykfjörð Gylfadóttir, fjármála- og efnahagsráðherra. Þingmaður Sjálfstæðisflokks segir einu sjáanlega lausnina að Svandís fari í annað ráðuneyti áður en þing kemur saman á ný. mbl.is/Eggert Jóhannesson

Mikill kurr er meðal þingmanna í samstarfsflokkum Vinstri-grænna eftir að álit umboðsmanns Alþingis kom fram um fyrirvaralaust hvalveiðibann Svandísar Svavarsdóttur matvælaráðherra liðið sumar. Sérstaklega þó vegna viðbragða ráðherrans og flokks hennar, sem virðast ætla að láta sér niðurstöðu umboðsmanns í léttu rúmi liggja.

Komi fram vantrauststillaga á matvælaráðherra er ósennilegt að margir þeirra vilji verja ráðherrann vantrausti, en verði slík tillaga samþykkt er alls óvíst að stjórnarsamstarfið lifi það af. Má raunar heita ósennilegt.

Frétt af mbl.is

Telur ekki tilefni til afsagnar Svandísar

Þingmenn Sjálfstæðisflokksins, sem Morgunblaðið ræddi við, eru mun afdráttarlausari í sinni afstöðu, en hljóðið er einnig þungt í framsóknarmönnum.

Þeir eru þó ófúsir til þess að láta nokkuð hafa eftir sér, en óskað var eftir því að þeir væru sparir á yfirlýsingar fyrsta kastið. Bæði til þess að Vinstri-grænir næðu áttum í málinu, en einnig svo forystumönnum ríkisstjórnarinnar gæfist ráðrúm til þess að ræða það frekar.

Frétt af mbl.is

Þungur áfellisdómur yfir matvælaráðherra

Stólaskipti eina lausnin

„Ég veit ekki um einn einasta þingmann í mínum flokki, sem myndi verja Svandísi vantrausti sem matvælaráðherra,“ sagði einn þingmaður Sjálfstæðisflokksins í samtali við blaðið, en flestir þingmenn telja blasa við að vantrauststillaga komi fram á fyrstu dögum þingsins.

„Eina sjáanlega lausnin er að hún fari í annað ráðuneyti og það er ekki mikill tími til stefnu áður en þingið kemur aftur saman.“

Frétt af mbl.is

Kallar eftir afsögn matvælaráðherra

Annar stjórnarþingmaður taldi að innri spenna hjá Vinstri-grænum skipti máli í þessu, Svandís væri áhrifamikil innan flokks síns. Vandinn væri einnig sá að þar á bænum virtust ekki allir, þar á meðal Svandís sjálf, gera sér grein fyrir því hvílík alvara væri á ferðum.

„Ég held að það sé rétt að þau geri sér grein fyrir því hver staðan raunverulega er. Ég held þau trúi því ekki.“

Annar sagði þessi vandræði hins vegar vekja alvarlegar spurningar um stöðu forsætisráðherra.

„Er það virkilega svo, að Katrín Jakobsdóttir sé í svo veikri stöðu sem formaður Vinstri-grænna og forsætisráðherra, að hún geti ekki látið einn léttan ráðherrakapal ganga upp?“

Nánari umfjöllun er að finna í Morgunblaðinu í dag.