Guðni Th. sæmdi Bjarna stórkrossinum

Forseti Íslands sæmdi í lok síðasta árs Bjarna Benediktsson utanríkisráðherra stórkrossi hinnar íslensku fálkaorðu fyrir embættisstörf, en Bjarni var forsætisráðherra árið 2017.

Þetta má sjá á lista yfir orðuhafa á vef forseta Íslands.

Hefð er fyrir því að forsætisráðherrar séu sæmdir stórkrossinum, en ekki hafa allir fengið eða þegið þá heiðursviðurkenningu.

Nafnið sett á vefinn eftir fyrirspurn

Bjarni var sæmdur orðunni þann 22. desember 2023 fyrir embættisstörf en tilkynning þess efnis rataði ekki á vef embættisins fyrr en núna í janúar. 

Fjölmiðlar voru ekki látnir vita þegar Bjarni var sæmdur orðunni.

Viljinn greinir fyrst frá.

Fram kemur í umfjöllun Viljans að nafn Bjarna Benediktssonar hafi hvergi komið fram á lista forsetans yfir orðuhafa á vefsíðunni, en að það hafi breyst í kjölfar fyrirspurnar Viljans.

• Blogga um frétt