Jökulhlaup hafið og eldgos talið líklegt
Setja bókamerki
Jökulhlaup er hafið úr Grímsvötnum og auknar líkur eru á gosi í eldstöðinni. Þetta segir Magnús Tumi Guðmundsson, prófessor í jarðeðlisfræði við Háskóla Íslands.
Hann telur jökulhlaupið verða lítið. Það muni koma undan Skeiðarárjökli og renna í Gígjukvísl.
Hann kveðst búast við eldgosi á næstu misserum, þó erfitt sé að segja til um hvenær það verði.
Stærsti skjálfti sem mælst hefur frá upphafi mælinga við Grímsvötn reið yfir í morgun og var 4,3 að stærð, samkvæmt mælingum Veðurstofu Íslands.
„Það er lítið hlaup í gangi. Það þýðir að þrýstingur er að minnka á Grímsvötnum. Það eru meiri líkur á að það gjósi á meðan hlaup er í gangi eða í lok hlaups,“ segir Magnús Tumi við mbl.is.
Aðeins klukkustundar fyrirvari
Hann segir það ljóst að Grímsvötn virðist tilbúin í gos. Skjálftavirkni hefur aukist og eldstöðin þanist út frá síðasta gosi árið 2011.
Grímsvötn eru langvirkasta eldstöð landsins og um nokkurra ára skeið hefur hún verið talin tilbúin til að gjósa enn á ný. Landris hefur mælst þar lengi og talið hefur verið víst að það sé sökum kvikusöfnunar undir niðri.
Árið 2020 hafði þenslan í Grímsfjalli náð sama marki og fyrir síðasta gos, sem varð árið 2011. Það gos var stórt.
Magnús Tumi bendir á að þá hafi aðeins klukkustundar fyrirvari verið á undan gosinu.
Allar forsendur fyrir sprengigosi
Magnús segir allar forsendur vera fyrir því að gos hefjist á næstunni. Aftur á móti sé það ekki staðfest hvort eða hvenær það muni gjósa.
Gos við Grímsvötn yrði sprengigos sem myndi raska flugumferð, að sögn Magnúsar.
„Merkin eru öll að koma fram. Það er ýmislegt sem bendir til þess að það styttist í gos. En hver sá tími er, við getum ekki slegið neinu föstu um það,“ segir Magnús Tumi, sem aðspurður kveðst ekki geta svarað hvort líklegra sé að það gjósi á næstu dögum, vikum eða mánuðum.
„Við þurfum að hafa vakandi auga yfir því, þar sem að Grímsvötn eru að síga. Þess vegna eru auknar líkur að það verði gos á næstu dögum.“
Gulur og aftur grænn
Stærð gossins árið 2011 kom á óvart, enda var þenslan þá álíka mikil og fyrir gosið árið 2004.
Fluglitakóðinn fyrir Grímsvötn var færður upp í gulan fyrr í mánuðinum, eftir að vart varð við hrinu lítilla skjálfta við eldstöðina.
Kóðinn var færður niður í grænan degi síðar, eða föstudaginn 5. janúar.
/frimg/1/37/0/1370088.jpg)
Vandræði Afganistan: ISIS-K, landamæri og yfirráð
Leitar til Tyrklands eftir 8 ára baráttu
Kaupfélag Skagfirðinga kaupir Kjarnafæði Norðlenska hf.
Nokkrir lýst áhuga á Skaganum 3X
Nýju stofnanirnar verða á landsbyggðinni
Vorum blekktir og erum líka fórnarlamb
Segir að engum skotum hafi verið hleypt af