Innlent | mbl | 11.1.2024 | 18:28

Kanna starfsemi vöggustofa frekar

Reykjavíkurborg hefur beðið börn, sem vistuð voru á Vöggustofunni Hlíðarenda og Vöggustofu Thorvaldsenfélagsins, og fjölskyldur þeirra afsökunar á illri meðferð sem lýst var í skýrslu vöggustofunefndar. mbl.is/Eggert Jóhannesson

Borgarráð samþykkti á fundi sínum í dag að skipa þriggja manna nefnd óháðra sérfræðinga til að kanna starfsemi vöggustofa.

Hlutverk og verkefni nefndarinnar verður að gera heildstæða athugun á starfsemi Vöggustofu Thorvaldsenfélagsins á tímabilinu 1974 til 1979, þar á meðal með hliðsjón af breyttum verkefnum vöggustofunnar á því tímabili. Nefndin mun geta ráðið sér starfsmann.

Framhald á rannsókn

Á síðasta ári komst nefnd, sem borgin skipaði til að rannsaka starfsemi vöggustofa sem reknar voru í Reykjavík árin 1949 til 1973, meðal annars að því börn hafi í ýmsum tilvikum sætt illri meðferð á Vöggustofu Thorvaldsensfélagsins á tímabilum frá 1963 til 1967.

Lagði nefndin meðal annars til að borgarráð myndi meta hvort tilefni væri til halda áfram frekari rannsókn.