„Maður er bara varnarlaus“
Setja bókamerki
Tengdar fréttir
Eldvirkni á Reykjanesskaga
„Þessi staða er bara ólýsandi og mjög ógnvænleg. Maður er bara varnarlaus gagnvart þessu,“ segir Vilhjálmur Árnason, þingmaður Sjálfstæðisflokksins og íbúi í Grindavík, í samtali við mbl.is.
Upp úr klukkan fjögur í morgun var Grindavík rýmd. Eldgos hófst klukkan 7.57, eins og greint var frá á mbl.is á sömu mínútu. Vilhjálmur segist vera dofinn og eiginlega hálf tilfinningalaus eftir atburði dagsins. Hann segir marga Grindvíkinga einnig finna fyrir gríðarlegum kvíða. Óvissan sé algjör.
„Það er að raungerast svartari sviðsmynd en menn bjuggust við. Í mörg þúsund ár hefur ekki opnast gossprunga svo nálægt Grindavík. Við vorum að treysta á jarðsöguna – að það myndi ekki gerast aftur.“
Stjórnvöld aðstoði Grindvíkinga
Ráðherrar munu funda um stöðuna klukkan fimm í dag. Ljóst er að ekki verður hægt að búa í Grindavík á næstunni. Vilhjálmur telur mikilvægt að stjórnvöld aðstoði Grindvíkinga við að koma sér í langtímahúsnæði.
„Við búum bæði við gríðarlega óvissu og áhyggjur vegna náttúrunnar. Það er ekki hægt að svara þeim spurningum en það er hægt að svara þeim spurningum um hvernig verði staðið með íbúunum í að leigja, kaupa eða útvega sér langtímahúsnæði á meðan þetta gengur yfir,“ segir Vilhjálmur.
Þurfi að standa með fyrirtækjum
Vilhjálmur telur að í framtíðinni verði gott að búa í Grindavík. Því þurfi stjórnvöld að standa með fyrirtækjum í Grindavík, annars muni bærinn ekki byggjast aftur upp.
„Við ætlum að byggja Grindavík upp aftur en það mun taka lengri tíma úr þessu. Það þarf auðvitað líka að standa með fyrirtækjunum og gefa þeim svör. Því lengur sem að fyrirtækin verða látin standa í óvissu þá ýmist munu þau loka og hætta eða flytja varanlega úr bænum, og bærinn byggist ekki upp aftur án fyrirtækja, það er nokkuð ljóst,“ segir Vilhjálmur og bætir við:
„Það verður gott að búa þarna í framtíðinni en við þurfum bara að bíða lengur eftir þeim tíma eftir atburði morgunsins.“
Tengdar fréttir
Eldvirkni á Reykjanesskaga
Lát hjóna í Neskaupstað: Ákæra gefin út
„Börn heima sem maður myndi vilja hafa í skjóli“
Var engin kristnitaka árið 1000?
Beint: Ný ríkisstjórn tekin við völdum
Ný ríkisstjórn kynnt á morgun
„Tímabil aukinnar eldvirkni“
