Innlent | mbl | 14.1.2024 | 11:17

Vilja fylla í skarðið og skoða frekari garða

Flogið yfir gosstöðvarnar í morgun með Gæslunni. Á myndinni sést hvernig hraunið er sitt hvoru megin við varnargarðinn og gróðurhús Orf Líftækni er fremst á myndinni. mbl.is/Árni Sæberg

Verktakar sem unnið hafa að gerð varnargarða við Grindavík og Svartsengi síðustu mánuði horfa nú til þess að fylla upp í skarðið á varnargarðinum norður af Grindavík, þar sem Grindavíkurvegur fer í gegn.

Er það gert til að reyna að minnka umfang hrauns sem kemst suður fyrir varnargarðinn. Þá er að svo stöddu ekki taldar miklar líkur á að gosið muni leiða til þess að hraun flæði niður í Svartsengi, þar sem raforku- og heitavatnsframleiðsla HS Orku er.

Náðu að fjarlægja allar vélarnar

Arnar Smári Þorvarðarson, byggingatæknifræðingur hjá Verkís, er einn umsjónarmanna uppbyggingar varnargarðanna. Hann segir að vélamenn á svæðinu séu nýbúnir að fjarlægja allar vélarnar sem voru staðsettar á varnargarðinum, en hann hefur undanfarna daga verið í byggingu.

Í morgun þegar eldgosið hófst voru fljótlega komnir átta tækjamenn á staðinn að sögn Arnars, en í vefmyndavélum í morgun mátti sjá starfsmennina í kappi við tímann, rétt við hraunjaðarinn, sækja vélar og koma þeim í skjól. Fljótlega hafi svo fjölgað aðeins í hópi vélamanna, en Arnar segir að það hafi tekist að bjarga vélunum og að nú taki við næstu skref.

Frétt af mbl.is

Myndskeið: Reyna að bjarga vinnuvélunum

Gosið hófst suðaustan við Hagafell, syðst á Sundhnúkagígaröðinni. Varnargarðurinn norðan Grindavíkur var í vinnslu, en skarð er þar sem Grindavíkurvegur þverar hann. Horft er til þess að fylla þar upp í. Kort/mbl.is

Horfa til að fylla í skarðið þar sem Grindavíkurvegur þverar

Segir hann að nú sé horft til þess að fylla í skarðið á varnargarðinum þar sem Grindavíkurvegur þverar garðinn. Segir hann að með því sé mögulega hægt að minnka umfang hraunsins sem rennur í vesturátt norðanmegin við garðinn þannig að það sameinist ekki og auki á flæðið sunnan megin við hann.

Hann segir ólíklegt að það takist að fylla upp í skarðið í fulla hæð, en að þeir muni ná að fylla eitthvað upp í það.

Nýr varnargarður í skoðun

Spurður út í næstu skref og hvort komi til greina að reyna að koma upp frekari varnargörðum nær byggðinni segir Arnar slíkt vera í skoðun. Segir hann það að nokkru leyti helgast af því hver hraði gossins sé, en að ef ákveðið verði að fara í verkefnið nú á eftir yrði það rétt norðan við Grindavík, enda er hraunið nú innan við hálfan kílómetra fyrir norðan nyrstu byggð Grindavíkur.

Frétt af mbl.is

Vonar að settir verði upp varnargarðar nær byggð

Spurður út í stöðu Svartsengis segir Arnar að miðað við hermanir þurfi gosið að aukast talsvert mikið til að það fari að renna í norðvesturs í átt að Svartsengi. Þannig sé nokkur hæð upp í skarð austan við fjallið Þorbjörn sem verji Svartsengi. Til viðbótar séu vélar til staðar sem gætu rutt upp garði þar sem landið er hæst og þannig aukið enn á varnir fyrir Svartsengi.